2019-02-22 21:12:45燕仔
從藍帶學校走到甜點職業戰場-第二回
我在藍帶學校的課程大概7個月就完成，最後的高級班我選擇了密集班所以課程較緊縮，放假時間較少，有了初級和中級班的經驗，其實就算高級上密集班都唔會太吃力，而且高級班後期就係做朱古力同糖藝show piece，所以係屋企既練習性都唔太高，只能好好把握實作課既時間，練得幾多得幾多咁，CHEF都唔會話太為難既，只要考試個陣你個製成品無穿無爛咁應該都會過，若然不幸碎掉咁就難講D，所以一切以安全性為重。當然有D同學既作品真係好靚，我覺得自己藝術天分般般，所以課程完結鬆口氣就好。
前話講完，入到今篇正題係實習同工作，亦即係甜點職業戰場。
點解係戰場? 因為由你實習第一日，所有同學都深有同感：同番學好唔同。而我覺得番工有時同打仗咁無分別。
而係開始講實習或工作前，不如先講下點搵到份實習同點搵到份工呢?
我既第一份實習係藍帶學校安排既，我係中級課程提交實習意願申請，係中期檢討既CHEF會面亦有提及，而CHEF都有講解實習地點既選擇有咩唔同，當時大家十之八九都想去Pierre Herme之類既大店， CHEF語重心長咁講巴黎唔止呢間甜點店，我地應該想清楚自己想要咩。好似甜點店適合有家庭既人，因為佢地開始時間好早，同樣放工時間都較早，咁你晏晝放工仲有時間HEA下。而有D餐廳製作甜點空間唔係好大，只容得下一兩個人工作之類。我個人經驗而言，大牌店名聲好，對CV好，但實際俾實習生做到既野可能較簡單，試諗下人地出品咁嚴謹，點放心俾實習生做太精緻既野，稍有差池掉晒佢就會浪費左。細店我覺得係木人行，雖然出品唔會太精細，但因為人手唔算太多，所以實習生都可以上陣做CREAM做組裝。兩邊都辛苦既，我覺得大店細店都係其次，最應該祈求既係遇到好人好同事好CHEF。
題外話CHEF既小秘訣分享：當你有機會入去參觀甜點店既廚房，最重要係睇佢地既雪櫃(frigo)，個人覺得冷凍櫃都可以睇埋。當一個廚房既雪櫃冷凍櫃較細，代表佢地貯存既地方細，亦即係話佢地所有製作都要好新鮮，換句話講有D MISE EN PLACE既量做得唔大所以唔夠就要重做。而雪櫃冷凍櫃大既咁即係佢地做既量好大，佢地有大量空間去貯存成品或半成品，咁即係MISE EN PLACE唔會太重覆，但一次過要做好大量，而有D較簡單重覆性既工作都會係實習生負責。以上小秘訣確實應用係每個工作地方。
(雪櫃冷凍櫃大既意思係大到成間房咁個隻大，有一次係負21度既房既入面搵盒檸檬汁或者清點果泥之類，我凍到手僵忍唔住跑出去抖兩分鐘再入去，我覺得甜點人都可以去考反恐部隊)
前面都有提過藍帶搵實習唔算好落力，其實都無可厚非，當時只有一位CHEF負責，而佢應該都係碌盡人情咭咁幫手搵，搵到都仲要學生去面試無問題先會被錄取。
係僧多粥少既情況下，要讓自己較有搵到實習機會，除左上堂表現就係法語能力。
曾經聽到有同學去Pierre Herme面試因為法語太差被打槍，亦有同學直接收到學校EMAIL話無法幫你安排實習之類。所以雖然當時我並唔係太鍾意CHEF安排我去Fauchon，但既然有咁既機會就要好好珍惜。而且我好幸運，面試時又法文又英文咁甩甩咳咳，CHEF係好善良脾氣好好既女生，後來係FAUCHON既實習讓我遇到人和事，令我想繼續留係法國甜點路上努力，感謝CHEF。
之後既實習，我係自己寄CV，對方約面試，OK左就報讀語言學校續簽証同出實習合同，亦有係朋友介紹既，有一份仲係自己去餐廳親自遞履歷，一踏出門行到街口有個侍應追出黎，話CHEF想同我傾兩句，得左。其實係巴黎搵實習唔算太難，但競爭都唔細，亦因為咁，好多甜點店或餐廳都只聘用兩個月既實習生，一方面補足店內人手，一方面又可以唔使出糧慳番筆。法律只規定超過兩個月既實習先要出糧，少於兩個月既就無話必須，所以有時捱得勁辛苦兩個月落黎都係無收入，仲要自己墊生活開支同學費，我亦經歷過唔少窮困日子，諗番都幾辛酸。
曾經有朋友話，其實唔需要特登報藍帶或Ferrandi課程，只要你敢搏，先報個語言學校，再申請實習合同，草夠一定經驗開始搵正職或睇下有無老細可以幫手轉工簽。依家係巴黎多左好多日本韓國台灣既有志之士就係用打工旅遊既簽証黎攞經驗，都係個唔錯既方法，可惜澳門無得咁做。
接著講下搵工，其實同搵實習係類似，我第一份正式工作係由實習生轉為COMMIS正職，其實好多人都會係咁，實習做熟左個地方，之後轉做正職，皆大歡喜，老細又唔使重新TRAIN人，實習生轉做正職可以賺下錢。
奈何有D只有兩個月無薪實習就較難轉，因為本身正職既位置都唔多，老細又想慳錢。
之後其他正職我都係自己SEND CV，每日睇唔同既招聘網站，等電話，等面試，有時仲怕自己電話法文講得唔好會耽誤左或直接被打槍。見工面試亦會比實習嚴謹，CHEF會認真問你之前做過邊做左幾耐有無咩專長之類既，如果咁岩你做過既地方佢又識得個CHEF或入面既同事，咁就可以笑下氣氛輕鬆D，有D快人快語既直接問你幾時番得，OK就先試工之後無問題就可以番工。
呀!！係！係巴黎搵工係有試工呢一環，通常試工會係一日或半日，無薪，都有地方會係以EXTRA散工請你，觀察你做幾日無問題就轉簽合同，咁樣試工都會有糧出。我覺得試工係呢行黎講唔錯，因為你試做一日大概睇下廚房佈局咩環境，仲有甜點出品係咪你喜愛，其他點貨貯貨同事善良度之類都可以略知一二，咁樣正式番工前有個心理準備。當然簽左約一般都仲有試用期，如果覺得有唔妥都可以離開。而老細可能手頭上都有幾個人試工，試完再揀都仲得，所以雖然甜點呢行係好辛苦，但一樣係人搵工，工搵人，不論你最後有無入到個個地方工作，好來好去，試工要用正式番工既心態，聆聽同事，記住細節，就算當下入唔到將來可能江湖再會。
感謝分享!
http://www.yyj.tw/index.php/product/%e5%a8%81%e7%88%be%e5%89%9b/