2019-02-20 21:42:27燕仔
從藍帶學校走到甜點職業戰場-第一回
一直好想將呢幾年既巴黎奮鬥血淚史好好記低，除左可以鼓舞下其他想追夢既人，日後自己睇番都可以會心一笑。奈何自己拖延症一拖再拖，對上一次發文已經係4年前既事，中間經歷左好多高低跌宕，現在處於放大假狀態，所以都係時候俾自己一個五年大事回顧。
從台灣讀完大學回澳後，我開始辦公室女郎生活，其實生活都幾枯燥，所以每逄周末放假就係屋企整餅整包打發時間，之後仲報左IFT既糕點文憑課同做實習，然而法式甜點，要做到最好既話，都係要去法國打滾下，掙扎左好耐，將自己大半既積蓄投注落去，交學費，搵住宿，搞簽証，訂機票，工一辭，隔兩日，就飛了。
當時藍帶學校既名氣係亞洲好好，我亦上過IFT邀請藍帶CHEF來DEMO同實作課，再睇過一本于美瑞小姐既書，仲有一本係美國女生讀廚藝課程既書，加上仲有位model Amanda S都係讀完藍帶開店，所以當時覺得進入藍帶係推開夢想的大門。當時我亦比較過Ferrandi但佢地收生條件較難，學費再貴少少，又唔肯定上堂有無翻譯，所以都係選擇左藍帶。當然仲有好多選擇既，好似Lenotre, Paul Bocuse, Alain Ducasse, INBP,ENSP,Bellouet Conseil , 此外本地學校都唔少，不過有D只講法文既所以都要考慮番自己語言能力，如果唔係上堂好吃力，同同學CHEF溝通唔到又好辛苦。我雖然係澳門既法國文化協會學過下半年既課程但初來報到都係經常聽唔明，到真係學懂越黎越多法文都由工作同日常生活累積落黎，雖則依家都唔係百分百睇得明聽得明講得好，但總算過得去，尚有大把進步空間。
藍帶既生活，我之前都有寫過幾篇，已經係五年前既事，當時仲係舊校舍，前年學校擴充搬左新校舍係鐵塔附近大好多靚好多，仲要有唔錯既機器，唔係以前咩都手打咁痴線。連課程既內容都多左麵包課，品酒，餐飲管理之類既。當時有同屆同學話覺得藍帶學校課程太商業化，學生太多，CHEF無辦法照顧到每位學生，大家好似匆匆而來，上堂放假考試咁就畢業喇，甚至有同學話早知咁就揀Ferrandi，反正都一樣貴。
工作多年回望，其實英雄莫問出處，真正既決戰係離開學校後，踏入每份工作中實戰。好似藍帶CHEF話齋，我地係學校如同渡假，第時出到去做野你地就會明白。我覺得藍帶既好處係門檻較低，學生大部分都係中國人，就算其他歐美世界各地都有，佢地有D係屋企人俾錢供佢地黎既，有D專業人士想轉下行，有D係家庭煮婦黎ENJOY巴黎生活順便學下煮野食整甜點。藍帶課程係初級中級高級咁劃分，每完成一級有一張証書，三張証書加埋就有張文憑，實習唔係必須既，所以佢唔算全然職業訓練，好適合放假黎進修既人，我曾經遇過一位澳門女生係每年請一個月假過黎學甜點，經歷三年完成課程亦係個唔錯既做法。
所以其實都係個人選擇，我曾經係工作中聽到同事講藍帶實習生質素參差，有好有HEART好有熱誠既工作得唔錯既，都有D做三兩日幾個禮拜就劈炮，Ferrandi既實習生我覺得組織性係比較好，同埋比較agressive，始終佢地實習係必須既，如果唔實習就畢唔到業，同埋佢地每班有個CHEF跟得較足，搵到實習既機會都大好多。
近年聞說藍帶既CHEF係幫學生搵實習時唔算好積極，學校一方面唔想學生自己去搵，一方面如果學生結束課程一個月內未有實習就唔會出實習合同，咁即係如果CHEF幫唔到你搵，你自己又怕又唔識自己搵既，咁好可能就失去左實習既機會。
如果真係想踏入甜點職場，實習真係好重要好重要好重要，(重要事情需重覆幾次^^)
我係巴黎打滾多年，做過既實習應該都有三四個吧，有長有短，有人工既無人工既，真係咩都試過。
而每個實習都會有唔同得著，對你張履歷都有意義，好似我地係外地人，法國人對藍帶學校認識又麻麻，我地又唔似得本地既學生會有CAP, BTM, MENTION乜乜之類既專業訓練，所以每位CHEF最主要就係睇你做過邊度跟邊個CHEF做左幾耐咁，而你想搵實習(stage)定工作(travail)，CHEF對你既CV要求又會有唔同。
請相信我，呢個行頭真係好細，D CHEF之間都互相認識或有所聞名，
所以每份實習也好，工作也好，必須認真對待，好好開始，好好結束。
紅金偉哥 http://www.ai99tw.com/goods-35.html