2013-10-16 00:46:13燕仔

巨輪

 


身在巴黎既我仍念念不忘追港劇~

尤其係最近呢套<巨輪>,

故事背景係由七八十年代港澳兩地既生活開始一直講到依家呢幾十年既變遷,

主角由當年小朋友一直成長到大人~

雖然我既出身比佢地黎得晏,

但佢地既經歷都係小時候所聽所聞,

加上拍攝場景好多係番澳門,

不由得係劇中可以寄託下思鄉之情~

十年人事幾番新, 何況係一個跨越三四十年既故事,

每集既開頭都會有覆述番一D當年既重要事件報導,

好似偷渡居民攞身份証, 港督, 澳門賭城風雲, 大單既搶劫等等,

呢D事件可能依家年青一輩睇覺得好似歷史長片咁,

但係我地既年代每件事都係非常轟動, 直接或間接影響左我地,

雖然當時既我仲只係學生妹, 體會應該無比長輩們咁深,

但係我記得以前既功課, 週記, 報告, 點都會提及下時事民生既議題,

當年緊係烏琢琢咁老吹老作, 依家睇番反而有唔同既感受~

我係2004年中學畢業就過左台灣,

對當時既我黎講, 生活左18年既澳門只係隨住時代逐漸地開放蛻變,

但原來戲玉就係04年金沙一開放,

每年既寒假暑假番去澳門都覺得成個城市既感覺係唔同左,

而直到08年畢業番到澳門, 雖然海嘯時間係低迷過一排,

但復甦得超快, 好快賭場又興旺番,

人多車多地盤工多遊客多大陸客更甚多, 巴士逼的士缺電單車私家車無位泊,

曾經多次係大三巴既手信街下見識到萬人塞巷既壯觀,

或係巴士擠逼到無需扶任何野都唔怕跌, 因為根本逼到郁唔到,

更高層次既問題開始去到年青人上樓無望既現實情況,

突然我很想回去童年無憂無累踩下單車繞山行,

同朋友係海傍吹風傾心事,

一D簡單寧靜純樸既小幸福~這樣已經很快樂~

現在的澳門, 讓我懷念的只有家人和朋友,

而那些被繁榮攻佔的地方, 算吧喇~

係巨輪既戲入面依家講到羅信記剛開舖,

阿信同拍檔阿英一齊訓身搞好間舖, 由車仔檔到開舖, 中間經歷過好多困難同辛酸,

但佢地係湖邊長椅食住燒雞翼飲酒既畫面總係好激勵我~

可能因為我諗住係巴黎學完甜點, 籌多D經驗值後,,

將來總有一日都想有自己既舖~SO睇到佢地既故事不由得有份窩心~

上一代既人發跡, 同我地呢代要做起自己間舖,

面對既困難同風雨唔同, 但都各有苦處, 唔容易咧~

如果搵到個拍檔或朋友可以一齊拍住上, 當然會好好多~

有時我會覺得依家係國外留學既生活, 亦並非想象中開心精彩,

有時一個人呆在家成日或係街上閒逛會覺得好寂寞,

但也許如大牛所說, 當幾十年後回望番呢段日子, 就會覺得呢D寂寞好渺小~

大路上, 有著同樣是自信吧, 大概走得到這年, 再難辛都不會怕~

我好想係我四十歲時回望過去, 也會有這份感覺~

人生目標好難搵,

但一旦搵到就要落力去實踐佢,

而目標完成左一個又要搵下一個,

又要落力去實踐下一個,

人生實在難以活到無憾, 但求盡力而為喇~

時代巨輪會推住我地走,

人亦都可以推動時代變遷,

每個人都走係自己既人生路上, 希望接下來既人生會過得快樂同有意思~

上一篇:一半

下一篇:Finally