巨蛋牛奶麵包 (失敗版)
上次水果乾麵包呢個美麗既誤會, 今次唔會再有~
因為下定決心跟住食譜去整呢個巨蛋牛奶麵包~
BUT人生真係唔容易~整麵包有時都要講運氣~
所有材料加晒落去打, 又甩打又揉左好耐, 但好似都無上次既效果咁好~
不過第一次加鮮奶油落麵團, 同埋奶油量咁多, SO我都係慢慢打~
其實都怕自己打得唔夠或者打過頭~
不過打到手痛就放過自己~
接著拍少少水就放入盒度~
用冷藏法即係擺係雪櫃入面等佢發8-12個鐘~同上次既聖誕麵包一樣~
我睇過好多前人既經驗, 都話呢個麵包比較難發起, 可能係加左鮮奶油既關係,
SO發酵時間會延長好多~
我見擺左係雪櫃入面6粒鐘都無乜起息~SO我又拎番出黎~
擺佢係廚房~比較溫暖既地方~等佢回復室溫同繼續發~
後來阿媽煮好飯餸, 我見個鑊仲有D蒸氣咁~
SO就係個鑊擺個架~將盒麵團擺上去發~好似稍為有一點起息~
唔知係咪因為天氣太凍呢~~麵團無平時咁活躍FEEL~
後來我拎出黎拍少少粉~再排氣滾圓~放係烤盤上面進行第二次發酵~
我覺得麵包表面油油地咁~
後來睇番個盒有層油係度~
SHIT!我諗係擺係個鑊度溫度太高~搞到佢出油添~
心知不妙~
不過都係要硬住頭皮整埋佢~
焗個陣真係好香~~不過見到個包包無乜點發大就應該會失敗~
通常焗麵包個陣頭十分鐘個麵包會脹起得好勁~
但今次無既話可能D組織會變粗同埋幾硬下~
唉~整麵包真係唔急得~
出爐個陣, 雖然擦左牙都忍唔住想試下~費事擺到聽日會硬到唔食得~
其實出爐個陣都幾軟身, 食落都幾好味~不過見到D組織都覺得唔對路~
偏深色同埋無乜氣乳咁~勁怪~好似未熟咁, 但已經烤左成30分鐘喇~
一般麵包18~20分鐘出爐~但呢個SIZE大D都係25~27分鐘~
後來第二日朝早再摸個包已經變硬左~成舊石頭咁~
不過切開黎再焗番熱都仲算OK~
只係會食到一種油味, 唔係咁舒服, 同埋個味道好膩, 食一片就差唔多~
我覺得真係奶油溶左或者油水分離左咁~搞到個包咁難食~
唉~麵包失敗既挫折感都幾大, 會令人有一段時間都唔想再掂呢樣野~
同埋會成日反覆諗住到底邊D地方有錯同埋要注意D乜咁~
都隔左幾日既事今日先PO出黎~係因為我終於諗到幾個POINT要CHECK OUT番~
1. 酵母係咪又死左 (今晚搵D暖水試下佢, 一定要CHECK!)
2. 注意發酵溫度唔可以太高, 人地話8-12個鐘就乖乖地擺耐D, 唔好心急
3. 再唔係就直接用溫暖既方法發酵而唔好用冷藏法
4. 今次甩打無之前咁得心應手, 岩岩從頭到尾睇多次CAROL既甩打麵團片段~真係要虛心學習下~我都想有雲石面既工作枱呀!
5. 努力睇緊其他人用中種法~其實我都係鍾意用中種法多D~雖然時間長但麵包既保鮮期同質感可以保存耐好多~
以上~
反省~
再接再勵~