〈逐家來做總鋪師〉

 　　好朋友聚餐的時陣，除了到餐廳享用美食之外，逐家猶閣想欲有無仝的創意，感受新鮮的體驗。較早一人準備一項菜已經無稀奇，逐家想欲試看覓家己做總舖師是啥物滋味。

　　為著莫予主人傷費氣費觸，逐家著鬥陣去大賣場買菜。每一个人佇大賣場內底挑選家己欲料理的食材，自新鮮的青菜到冷凍的魚仔，應有盡有。結數了後，逐家捾大包細包的食材轉厝，捲手䘼輪流到灶跤內面展一下。其他的人就幫忙排碗箸，抑是幫忙削果子、準備甜點。

　　一久仔，逐家陸續捧菜出來。菜色誠濟，煮甲真腥臊，有煙腸炒飯、王梨蝦球、三杯杏鮑菇、烘羊排、炒青菜等等。逐家運用巧思共菜排甲真媠，食飯桌連鞭予遮的好料排甲滿滿滿，予人流喙瀾。　

　　好朋友逐家圍佇食飯桌頭前，一面看電影，一面烏白開講。佇厝內底，逐家會使輕鬆食飯。食飯了後，逐家攏來鬥相工，有的負責洗碗，有的幫忙拭食飯桌。家事有逐家鬥幫贊，真緊就會當做了矣，然後就會使食茶練痟話，消遣拍抐涼。

　　因為逐家的工課真無閒，隨人有隨人的家庭囡仔愛照顧，會當佇厝聚餐的機會無偌濟。若會使有時陣撥工擺脫家務，到外口菜館聚會，享受清閒的聚會時光，就誠可貴。難得的佇厝聚會，就變成逐家遙遠的青春記憶。

本文刊登在2020/11台江台語文學季刊