八點出發今日的行程。首先去一個個農家體驗的地方，山形縣都係一個鄉下地方，周圍都好多稻米田，而家正正係收獲的時間，但係到我地個多星期之後再去，佢地的農作物已經收割晒，所以特別留咗一幅田比我地拍攝，好近咁接觸到稻米田覺得好新鮮呀！

之後就去左一個捉鮎魚的地方，係一條河流，因為啲鮎魚會順流而下，所以整左一個竹台，等佢地自己遊上去，而遊客就可以喺河邊即刻橈魚食，好有風味！

肘折溫泉：呢度係一個小小的溫泉鄉，但係喺日本好出名，因為呢度可以治病，而且呢度的溫泉旅館，收價比較平，大約500港幣一晚，所以嚟得呢度的人多數住一個星期以上。每日早上仲有朝市，老人家就鍾意自己喺朝市買菜到旅館自己做飯，都好有特色。附近都有好多免費的浸腳溫泉，包括旅館前面同埋河流旁邊。

Lance梨：係法國種的梨，試過之後覺得味道似啤梨，但甜啲，成個口都有一陣甜味，離開之前，辦事處職員仲送左一個比我添！哈哈！

高畠葡萄酒園：係山形縣十一間紅酒廠的其中一間，呢個酒莊無論係社長定係製酒部門的主管都好有型，講英文仲好好聽添！佢地又送左兩支紅酒比我地返去試下，我地到時都會嚟拍體驗。

米沢牛：米沢牛排名排喺第三位，都係好出名的牛肉，我地就去左一𣄽最古老的和式廳餐。

今晚我地都係住連鎖酒店，仲喺酒店裡面食飯，由於時間尚早，可以到附近便利店行下。