八點出發去五色沼。

五色沼：嗰一帶有五個湖，每個湖喺陽光之下都有佢自己獨特嘅顏色，由於時間關係，我地只係行咗第一個湖的一半路，而個湖可以坐艇仔慢慢欣賞，遲啲有紅葉可能仲靚，而湖入面就有好多靚的錦鯉魚，最特別係其中一條錦鯉魚身全白，但就有一個紅色的心形，聽講見到佢戀愛運會大增！咁大個湖都無諗到會見到，臨走之際我好好彩，真係見到，仲叫埋大家一齊睇添！yeah

會津東山溫泉向瀧：一間有多年歷史，連首相都去過的日式傳統溫泉，係高級的溫泉，呢度的溫泉水係活水，直接由泉源不停咁流入流出溫泉之中，連洗手盤都係用大理石做添！都係話句，到時有紅葉會更靚。

大內宿：呢個地方本來係一個窮到燶的地方，喺山谷之內，以前啲人由山形行去福島就要經過呢度，喺度留宿，所以呢度有一條住宿同商業街，我地到時會喺其中一間民宿就住同拍攝。而聽佢地講附近有一間麵店係用大蔥嚟做筷子！我即刻諗起，之前寫《千奇百趣》時，寫過一條無出到街的片，就係呢間大蔥筷子麵店！估唔到事隔幾個月，我可以親身嚟到，感覺好意想不到！

最後我地覺呢呢個縣唔係好夠野，就決定加多一個地方。

長門屋：一間有一百六十年歷史的和菓子店，我阿媽嚟到一定發癲，佢啲和菓子好精美，而家做到第五代，有三間店，我覺得佢最有心就係喺其中一間店的二樓，做左一個展覽廳，展示佢家族百多年前用來做和菓子的用具，同埋以前日本賣糖果的樣，用有小朋友的玩具，小林先生嚟到好開心，可以回憶童年，亦都帶比好多人童年回憶！

迴轉壽司：喺香港好少去食迴轉壽司，只因大多都唔好食，不過呢晚我地就喺日本食咗壽司做晚餐，原來價錢好平，105yen一碟，最過癮就係，而家佢地用touch screen　　 order，當你oder咗的食物，就會喺迴轉帶上的一條軌道由一架新幹線列車送到去你坐位的位置停低，好可愛！又有效率！

今日全日都落雨，真係有啲掃興，天氣又凍咗好多，希望明日會好啲！