今日天氣依然好差，時時落雨。

第一站我地去東北一間好識得promote，亦都有出名的的神社。

弥彥神社：為咗令日本的年青人會去神社祈福，日本神社界就有人諗到計，將神社嘅地方叫做"power spot"，即係你去左就會行到power咁解，果然，改咗個好名，全國神社都鹹魚翻生！多左好多年青男女齊齊去。弥彥神社身為東北地區有名的神社，堂然亦都人頭湧湧！雖然有啅頭，但係我就嫌呢度嘅符太普通，所以無買到！另一個有趣嘅地方係，原來而家仲有新車祈福，當你新車落地，又想作個福保平安，就可以揸架車去，比主持作法！覺得好搞笑，但人人都好認真！

弥彥山山頂：位於弥彥神社旁，有免費巴士車你去Cable Car站，一來一回盛為1300yen，都幾貴！呢個山只有六百三十四米高，同日本而家興建中已經好有名氣的東京sky tree，一樣有634米高！過多個幾星期，上山途中見到的樹林就會變成紅葉，好靚架！第一次坐啲要企的cable car，仲係三十人一齊上添，都幾逼！上到去就有一間食店同紀念品店，喺山頂上行，仲有一個為戀愛而祈福嘅power spot，不過無時間無去到，我地一行五人的lunch就係喺呢個山頂上，由於當時太潮濕，所以咩風景都睇唔到．．．

弥彥公園：一個將會成為夜賞紅葉的地方，而家當然暫時咩都未睇到，但其實環境都不錯，喺正門入口的位置，仲有一個以神社為模樣的火車站，站前都有入神社的洗手裝置，直頭一間神社咁！

宝山酒造株式會社：一間小型有一百三十年的自家日式清酒酒廠，但係製造出嚟的酒有名，仲年年攞獎，本來好怕飲米酒的我，試咗一小杯，味道一啲都唔刺喉嚨，好清好純，不愧為大吟釀！呢度仲有一種米酒，可以用來做爽膚水添！賣600yen！皮膚好好的老闆娘話，佢都係用咗呢支米酒咋！

糸魚川：原來日本都有出產翡翠，係天然的翡翠，起初喺一間有工場專賣玉石的店見到啲玉石都無咩感覺，但後來帶我地去到當地一間專為呢度發現的玉石所開的博物館時，先至見到啲靚野，喺射燈之下，一舊舊原石先現形，石玉原來係好翠綠的！不過由於呢度產量少，而且仲要等大風大浪的日子過後，先會喺糸魚川發現有啲玉石沖左上岸，同埋早年好多人都喺河流拾玉石，而家政府已經禁止，但係海邊就仍然可以拾，拾唔拾到就睇你運氣啦！

是夜我地就去赤倉，赤倉係一個溫泉好出名的地方，冬天仲係滑雪聖地！嚟到呢度天已黑，抬頭一望，成個天都係星星，好靚呀！雖然天氣好凍，不過都忍唔住要睇耐啲，聽我地住宿的酒店職員話，十一月呢度就會落雪，唔知拍攝時會唔會見到雪呢？

佢話一個小時落雪有30cm架！

今晚由於我地要同日本的代表傾好咁多日的拍攝，所以一傾就傾到凌晨兩點，好攰哦！