唔好誤會我想自己創業,我係一個死窮鬼~~~~

其實想打呢篇野好耐,事源係有一次豬戲言,將來可以搵cash同我開間鋪頭仔式ge商店~~~~咩係鋪頭仔式呢??即係而家開到通街都係ge,只係賣遊戲機主機&配件,另加改機服務同賣下翻版,正版遊戲數目係十隻手指數得哂~~~~因為荃豐有間咁樣ge商店叫鋪頭仔,所以就叫鋪頭仔式la~~~~

其實呢篇野會比較偏向遊戲機,但我都好想睇緊ge你/妳可以睇埋佢,支持下我都好丫~~~~

豬可能都唔記得自己講過d咁ge野,不過我就好記得~~~點解??因為佢好白痴lor~~~~佢應該以為開一間遊戲商店好容易,其實係香港開一間賣遊戲ge鋪頭係唔易~~~~

第一,香港本身已經有好多好出名ge鋪頭,做左幾十年都係呢行,係玩家同網民心目中有一定口碑,所以好難同佢地鬥~~~~當然,每一行都會有呢個情況出現la~~~~

第二,如果好似豬所講ge咁樣,想買下老翻,幫人改下機,即係搵下偏財,首要條件係要有門路~~搵到條路,都唔代表你行到,相信有多少常識ge人都會估到,可以供應老翻ge人一定唔係善男信女,或者話佢地一定係有勢力人士,佢肯唔肯俾你玩係一個問題,佢肯俾你玩你夠唔夠膽玩又係另一個問題~~~~好la,到佢肯俾你玩而你又夠膽玩,咁即係做得成生意,你又要開始擔心海關掃場,隨時要走鬼~~~~我又當你次次都收到風走得切鬼,當海關要做野俾市民睇個下,你都隨時變炮灰,所以唔係個個可以搵偏財~~~~

第三,當你唔賣翻版,做正當商人(係,我將所有賣翻版的都當唔係正當,當然,有d賣正版ge都唔係好人...),香港一直以黎購買電子遊戲ge風氣都係以翻版為主,而且仲係壓倒性ge翻版為主,唔係話得香港係咁,世界各地都有呢個問題,但可以肯定咁講,香港係一個好嚴重ge重災區~~~~詳細唔係呢到講,唔係會離題,我得閒無事無野做食飽飯等屎屙個陣會打多篇解釋下,到時都請多多支持~~~~(賣廣告??)

第四,利潤問題~~~~以電子遊戲黎講,一個消費者買一千蚊野,個間鋪頭大概可以賺到五十到八十蚊~~~覺得好少,係咁上下ga la~~~~其他行業又點呢??一間茶餐廳,一杯奶茶成本三到四蚊,凍飲可以賣到十三蚊一杯,一碟飯成本十至十五蚊,最少都可以賣廿五到三十蚊~~~~一件有個剔ge t-shirt,可以賣三五百,成本講緊都係八至十蚊一件,佢貴係貴在個牌子,基本上用料唔會比你係女人街廿幾三十蚊件個d好好多,當然係手工同染色方面會好d,但唔會值二三百蚊~~~~對比返賣電子遊戲,利潤真係好好~~~~咁點解又會有人口6笨賣電子遊戲呢?都好簡單je,你覺得賣衫ge鋪頭多定係賣game ge鋪頭多?你又覺得食飯ge人多定係打機ge人多?亦都因為有需求,所以一定會有供應ge~~~~順帶一提,你買一本三十蚊ge漫畫,個間鋪頭賺五至六蚊,未計燈油火蠟同人工租金運費~~~~

第五,資金問題~~~~呢個都係每個生意人都要面對同解決ge問題,我唔多講~~~~

第六,對電子遊戲ge熟識~~你開餐廳,唔玩特色,普普通通賣下豬牛雞扒,得閒加塊鐵板俾佢,再賣埋咖哩沙爹豬牛雞肉公仔面,整多兩塊西多奶醬多油占多,最後加埋咖啡奶茶檸茶檸水,你個客行入黎九成都搵到野食~~~~你賣電子遊戲就唔得,邊隻game會好賣,邊隻game會唔好賣,要睇製作人,出版商,發行平台(即係出係邊部機)等等ge野~~如果係續集,你又要睇埋前作評價,缺點改善等等ge問題~~仲有仲有,要考慮埋同期對手,即係同一時間,會唔會有其他好hit ge遊戲推出,會又要考慮埋對呢隻game ge影響~~好la,你考慮完呢隻game,咁佢ge對手ge銷量都會受到佢ge 影響,咁你又要計數~~好運捉到路就賺,一有失手就坐艇~~~~

仲有好多好多好多其他ge問題,好似話入貨,你入一部主機,d廠又要你跟一至兩隻game,變相入d唔知賣唔賣得去ge野,所以你明唔明點解買部NDS佢一定要你買一隻game,因為佢入部NDS 個陣就硬食左隻game~~~~睇落佢入一機一game,賣又係一機一game,無咩問題丫~~~~但係你買個隻未必係硬食個隻,咁個隻game點返本??你又會話,我唔買總有第二個人買~~但係d廠要佢地硬食ge game通常都係 1.舊game 2.冷門 3.地雷作(即係出之前講到點勁點勁,點知出左俾人評為廢game) 當中3係最多,亦係最大鑊~~因為製作商對隻game有信心,出貨多,但係出到黎唔合玩家口味,銷貨量少,所以d死貨就會由批發轉介俾零售~~試問有幾多人會有去踩地霤??反而舊game都可能會有人搵,冷門出貨量都唔會多,問題比較細~~~~

仲有其他問題,我都唔知點樣一一講出,亦都無辦法講到,始終我都唔係話知到得好多,知道ge亦只係好表面ge野~~俾專家見到我呢篇野笑死佢都有之,但係我都想同大家分享一下~~~~

其實我上面講ge問題,基本上每一行都會遇到,我都只係講出電子遊戲零售商ge角度會遇到ge情況,生意真係難做........無錢,無毅力,無決心,真係唔好亂咁創業~~~~

ps1:仲記得豬話,佢負責係鋪頭打機,cash負責執頭執尾,我負責sell,咁我點解要搵妳兩個廢人呢??我唔識打機執頭執尾...........
ps2:如果我有一千幾百萬閒錢我或者會考慮做呢行~~~~問題係我有一千幾百萬閒錢我做咩仲要做??
ps3:如果你/妳睇哂成篇野,我好多謝你/妳~~亦都希望你/妳留個言支持下~~~~
ps4:如果你/妳無睇哂成篇野,唔該你/妳即係拉返上去睇哂佢~~~~
ps5:如果你/妳無睇哂成篇野,睇完上面個句就睇呢句,我會唔開心&詛咒你/妳的~~~~
ps6:如果你/妳睇哂篇野覺得哂左你/妳時間,請留言鬧我~~~~
ps7:如果你/妳話我係日記打唔係日記ge文章,我會講我呢個係新聞台,況且就算佢係日記,佢係我ge日記,你/妳理得我打咩je,我係想你/妳留言je~~~~
ps8:如果你/妳覺得我打埋哂d咁ge野係浪費時間,我會答,我d時間係我ge,你/妳理得得我點用丫
ps9:如果你/妳睇到落黎呢度,我真係衷心感激~~~~