我自細就係一個藥煲，經常生病需要食藥。而且每次病都手尾長，唔會睇一兩次醫生就可以好得番。

到我慢慢成長，身體抵抗力比較好，病的次數就減少了。但係好日唔病，一病親就束手無策。可能係而家病毒多抗藥性，今次打敗仗我食幾日藥都未見好轉。抗戰已經持續了兩個星期，我諗重起碼要守多幾日。不過呢，我其實唔多喜歡食藥，唔係話怕食藥，係怕軍事競賽。D病菌會遇強愈強，之後人類又要整過哂D新藥，盞搞！所以呢，都係靠自己平時多做運動，增加軍力唔駛藥物干涉內政。

講真呀，香港人真係有點營養失衡。尤其係新一代，唔係太肥就係細細粒似足哈比人。相比之下，日本就極度重視營養學，甚至立例規定小朋友要攝取大量的DHA，所以日本後生仔個個都好高大，而且智商偏高。香港應該學下人家，強制發展營養學，監生谷起D細佬仔。冇理由矮過日本仔架嘛！

除左營養同運動之外，心理因素亦都係要非常注意。我舉一實例：我由小學至中學讀的學校都算優等，讀書壓力很大，每逢測驗考試，我都會病到。次次都係，好地地都會無喇喇病，真係好邪。後來我轉校到一間比較「雞」的中學，考試時就再冇試過病，成積重大有進步，仲過左人生中最開心的兩年。原來心理壓力會累積成病，俗語話「屈到病」是有根據的。注重體能同時都要留意心理健康。適當時候要識得自我減壓，記住：淡定，有錢剩！

不過前日報紙話，做我呢行壓力大，工作冇定時，多數短壽喎！諗落又真係，我眼見好多師傅退休幾年就話玩完，可能係受左幾廿年壓，一下子冇哂壓力就乜病都發埋出黎掛，筆退休金益哂佢老婆。


計我話，生死有命，唯有及時行樂，趁後生周遊列國，玩而後已。人生終不免一敗塗地，若如此，雖敗猶榮。