我地時常受到傷害，其實最能夠傷得我地深既，往往係我地自己。
傷害我地自己既，更加係我地保護自己既執念。
被人傷害後，唔肯重新過新生活，自己將自己埋藏係上次既慘痛經歷入面。
幸福敲門，屋入面既人，生怕會有惡魔妖怪，緊閉咀巴，將空間扮作無人存在。幸福見無人應門，於是只有走回頭。

聽到腳步聲漸次遠去，失落越加濃烈。
空間裡遺下一片死寂以及慘痛回憶，自己在空間裡繼續悲傷，埋怨點解無人送幸福比自己。

受到傷害，唔緊要，用d時間慢慢調息，調息入面包含改變自己既意思。
過程總係痛苦既，比起將自己收埋更痛苦。因為調息除左要面對別人既缺憾，仲意味住要面對自己性格既缺憾，審判自己既缺憾。
結果可能係無罪釋放，保持認為無罪既自己，生存方法有兩個：一係走遍世界，搵一個包容到自己缺憾既人，一係接受人地冷待自己，睇下你認為幸福既定義係乜野啦。
差d忘記，調息又有另外一個名，叫做「成長」。

我地每日都生活係選擇裡面。
而我，期待調息既結果。