我身邊大大話話都有五六個女仔做出一d等人飛既行為。第一個係我。
態度極差，故意地差，將佢終於開始嘗試為我付出既丁點心意，目無表情地ban返轉頭。
最後，我成功喇。佢終於無再搵我喇。
雖然明知呢個係我預期既結果，但係始終唔會係一件好受既事。
大個女既我，又平平安安咁獨力撐過。我相信我既決定。


你會問，既然等人飛，點解唔自己主動出擊？
好簡單姐，分唔到囉。明知大家最後唔會有好結果，明明佢對自己唔好甚至可以稱之為衰，但係又做唔出手起刀落，唯有做到你唔衰我衰。

已經提出好多次分手，但係女人記性係差d，每次佢比多兩錢肉緊，又唔記得佢幾衰，平時點對你呼呼喝喝，點忽冷忽熱，防線又就咁被衝破。
即使呢個男人唔愛你，你提出分手既話，佢都不甘被飛又或者未搵到第二個代替你，於是會追返你，所以唯有等佢飛你。

受夠喇，唔想再過呢d情緒癲波既生活。
唯有將平時有幾大小姐、有幾刁蠻任性、有幾粗聲粗氣一次過，發揮到極致。

「飛我丫，笨！」