玩o左成晚
26/12我阿妹一朝早就帶o左朋友仔番屋企
搞到屋企變o左K場
仲迫我做neway員工
要我幫佢插咪打碟翧茶遞水
所以食完lunch之後就同安打姐出街
廢事再做冇價勞工


個日真係好開心
一路行街一路食
好耐都未試過咁free
下午茶同飯後甜品下一篇續集先再講
呢篇講下Dinner個餐先~!


雙子座o既人真係特別怕悶同花心
打姐一出到街購物慾就即刻旺盛起o黎
見到乜就想買乜
o係我陪同下 打姐買o左方大同隻debut
我而家正正游說緊麻吉弟弟買埋 hohoho
不過我好鍾意同大豪客出街
睇到人買o野買得咁開心
我都可以望梅止渴呀嘛~!
雖然個日就冇咩收穫....
不過就好有口福


行到七點幾，打姐有兩個提議，都係o係朗豪坊
我個人咁隨和，梗係冇所謂啦
以為要等位...原來冇乜人
門口有女侍應帶位，不過有三位港女打尖
明明係我同打姐排哂隊早到先
個女侍應睇o黎都係欺善怕惡o架啦，帶o左三位港女入去先
又冇出聲叫我地等等，直情當我地冇到
我都同打姐講算啦...o黎到旺角...自然多MK o架啦
唔係話睇死旺角人，只不過係對事唔係對人
而MK只係簡單又易明o既一個稱呼
不過都要讚一讚間cafe
因為佢地全店禁煙
如果唔係...我估呢度真係會變成MK o既集中地


女侍應終於返o黎應酬我地
我地被編派到兩人座位...似係俾情侶一齊撐檯腳o既位置
因為迫到可以咀對咀咁滯
離譜o既係...同隔離檯只隔住半身咁高玻璃...好似同埋佢地一齊談情咁
除o左太迫之外，張苐都好唔舒服
不過環境唔錯，樓底好高好空曠好舒服
露台位置仲可以望到大電視，睇到成個朗豪坊
而全店都可以欣賞到朗豪坊數碼天幕
門口擺o左好大幅banner promote dinner set
點知座低之後侍應姐姐話冇set dinner
我覺得有欺騙之嫌...
之後叫o左男侍應仔仔寫單
但佢冇寫到，用腦就咁記住就算，又冇覆一次單，好唔專業
menu 相中o既食物又唔夠清楚，細格到爆
好彩食物名都幾吸引



===薄 燒 牛 肉 比 薩===　$48
細份到....大份過龍堡個d少少
薄餅皮上面有好多”打邊爐”o既肥牛
牛肉 - 少少油膩，有”打邊爐”o既風味，中菜口味
芝士 - 味唔太濃，幾香口，西菜口味
薄餅皮 - 薄+脆，好似食緊嘉頓梳打咁
雖則係咁騎呢d配搭...但就幾好味．．我幾鍾意
我認我大食...不過打姐絕對唔係
4小片pizza好快就清o左碟~
侍應收碟都好快



===雜 菌 照 燒 雞 意 粉===　$58
打姐話賣相同乾燒伊麵好似，估唔到味道都係
係幾多汁o既,意粉味道鹹得黎好似落o左半樽老抽咁
(唔係生抽,係就死得人)
意粉好正 彈牙爽滑
官方話 ”100克意粉以攝氏95度煮7分鐘，滴油不加” o既煮法
唔知有冇咁誇張~!
雞肉少少鞋，菇就冇乜菇味
食完好多油留番o係碟度
可惜...等o左好耐都冇人肯收碟
本來想叫京都朱古力新地做甜品...
但打姐激到要轉移陣地再食過~




總括呢講 味道唔會衰到貼地
但份量真係少到好似乞食咁
你可以賣貴d...但唔好以為個個女仔都要減肥至得o架
我就算真係被評估為要減肥，但我冇呢個勇氣

效率 :
好快..唔使十分鐘已經煮好上檯，所以我懷疑食物order後再加熱
但我地俾咁o既價錢...唔係想食快餐囉

服務 :
冇乜好感　冇適當時候收碟　冇加過水
收得咁o既價錢...唔係想食大排檔o既服務態度
打姐重申D侍應好唔得呀

官方資料話Suzuki係新加坡咖啡品牌
o係日本好出名o既日式西餐廳
打著”日本菜與法國菜的融合變奏”o既旗號
但一D日本味都食唔出
法國菜o既味道只能夠係個幾塊”樹葉”食得到
我亦都唔信日本個間Suzuki會叮翻熱d o野食物俾人客

價格 : 唔值

特色 : 冇乜特別，有香港雜誌提供

評價 : 欺騙/虧待食客

CrossOver唔係人人都玩到
今次2粒1/2星

SUZUKI Tokyo Cafe Bistro
地址: 旺角亞皆老街8號朗豪坊12樓
電話: 2392 3386


美食model: 憂鬱聖誕造型(打姐)