wah~沙田十四度呀而家~!
呼~好凍呀~!
搞到我不斷咁食呀食呀~!
個肚就快爆...飽係飽..但依然未夠暖
有諗過好唔好食杯食糕暖下身...
但又驚感冒未清哂，中番招就唔好啦
身邊又冇人可以俾我取暖...
我既角色只限於做heat loss果個
唉...想heat gain都冇福份
好想做李珊珊..又有錢嘉樂又有蛇...
(我唔需要佢副身材...我夠用有突)
秋風都走啦...冬風吹得咁行...蛇都肥死


上一次去食蛇
四月呀...係咪好喪呀?!
冇計啦...我超鍾意食呀..
Ummmm..諗起都流哂口水
又係一行三人
今次有我有健將有達爺
健將唔食蛇o架
不過俾我威逼利誘佢唔食蛇都可以食糯米飯
點知去到冇暖粒粒o既糯米飯賣
嘩哈哈哈哈哈哈哈哈哈哈
佢唯有一齊食
三個人share o左個大o既蛇羹


以前媽咪通常都帶我去觀塘食
或者大圍近近地都有得食
而家自己搵食梗係揀間好o架啦
o係深水步地鐵站附近搵呀搵
搵o左好耐都唔知係邊
週圍都係蛇王X，但唔係我地o既target
之後見到食環署d督察，問佢地實冇死啦
點知班人唔知蛇王X係邊又要亂點人
真係激死...



===蛇羹===　(細 $27/中 $40/大 $52)
呢個時候應該食蛇羹套餐(蛇羹+糯米飯)因為好抵
不過淨係蛇羹已經好好味
又足料..唔會水”嗲嗲”
可以好明顯咁食得出蛇肉絲同瘦肉絲
蛇肉絲係好多...唔驚佢會呃你
阿媽最鍾意落黃色”脆脆”，有時會落”花瓣”
不過蛇王善冇”花瓣”，反而有檸檬葉
我唔鍾意卜脆所以就放o下檸檬葉試o下
好特別，好甘，咬落有d草香
不過成兜卜脆俾兩條友食哂...癡線



今次好滿意呀有五粒星
舖面比一般蛇舖光猛，乾淨，整齊
係我意想唔到o既
舖頭有大約三張大，兩張細圓檯
地方幾闊落，冇迫夾o既感覺 (可能四月去唔旺場關係)
不過門口有個蛇箱裝o左D黃黃綠綠o既燈
好娘，有D似台灣個d蛇舖
老闆好好傾好nice
我地仲問o左個好silly o既question
就係蛇有冇骨?
(我+達爺 vs 健將,結果我我+達爺輸o左，都怪自己唔學好Bio)
老闆就笑我地，又從佢兜大蛇羹窩打撈條蛇骨我地睇
仲話多骨到你唔信....
咁又冇啦啦學到野~好搞鬼


蛇王善
Shea Wong Sin
地址:　深水步桂林街50號地下
電話:　23861593