今日玩左個占卜係問”你會玩到幾時”呢個占卜主要係針對玩呢種心態,不論係愛情、工作等*2
小頤既結果係:活在老玩到老。哈哈哈哈!!!我諗都岩..我呢個人好中意玩,而且中意不停玩...玩少陣好似會死咁
打個比喻,坐個第一個位對住個miss上堂,其實應該冇得玩,但係小頤依然係可以繼續玩;玩手指、玩筆、玩書、搵書既內容黎玩、玩隔離果個、玩到去隔離果幾行都得,
反正玩得既都玩...通常玩到冇野好玩既時候,我就會諗辦法發明d新野俾自己玩...(din din地)
不過玩還玩,我玩得黎有條件。我會好認真咁玩,而只中意玩贏唔多中意玩輸;所有野對於我黎講都可以玩,讀書、愛情、工作、待人處事、甚至管理自己。
讀書讀得好,工作做得好,待人處事處得好,搞得掂自己就等如玩贏;相反等如玩輸;
關於愛情,我認我中意玩但係我好認真咁去玩,不過愛情亦係唯一一樣好難話贏定輸既野。點去玩贏?點先算贏?我依然搵緊答案,呢個關卡之一,我仲未打爆機。
玩,有1個好大既特質,就係玩俾人感覺會開心、有趣;所以我中意玩,我相信每個人對追求快樂都有唔同既方法,將玩放入我既生活之中係我追求快樂既方法。

有人會覺得玩唔好,因為覺得玩等同唔認真,等同唔尊重同埋一定唔會成功。
玩,唔一定係唔好。玩都可以係一個成就,玩得專業、玩得好、玩得到次次贏,都需要技巧、經驗、識玩同埋我認為最重要既--認真。
玩係一種生活藝術,成功咁用玩既方式去完成一件事,自己開心又有成功感。
有人覺得玩唔好係因為玩帶有危險性質;玩好似一架跑車咁,可以好易開到好高速;
唔識玩既人,好易玩過頭,玩到走火入魔,玩到車毀人亡。所以大人都唔建議小朋友太中意玩,因為佢地未必識玩。
玩對於初學者黎講,係一個危險既冒險,夠勇敢去玩唔代表一定會贏、仲要有膽面對重重考驗同埋有勇氣面對受傷同輸。
玩得耐唔代表你會升級,玩得短時間唔代表你一定有排挨,呢d野要睇你玩咩,睇你果樣既天份。
岩岩開始玩,可能會越挫越勇,以前我就係咁,咩都玩,咩都敢玩,衰左一次唔緊要,衰十次都係繼續玩,終於有日玩玩下唔小心出左事,就咁一次game over。
終於輸左第一次勁既,我先發現我只係敢玩,但係根本唔敢面對真正既失敗。由個陣時開始,我先知道玩,唔止係玩咁簡單。
我開始學點去玩,一開始只係一心想贏番輸左既野,因為我唔甘心,唔敢去面對自己既輸,
後來慢慢發現要繼續玩落去必須先學識面對輸既事實,承認失敗既真相,接受自己既失敗,
因為輸,其實就話緊俾我聽點先可以贏。冇輸過,就唔知自己有咩唔好;輸左,先知自己有d咩唔好,先知下次應該點先唔會輸。
要贏,就要學識輸。未輸過而贏既人叫好彩,輸過而贏既人叫有進步;因為輸過既人會更清楚點去贏。
人可以玩足一世,但係唔可能贏足一世,輸總有一日會黎。所以我學識輸,學識有時候要輸少當贏、要輸得有技巧、要輸得好好睇睇。

我中意玩,玩係我既生活態度亦係我既生存哲學;玩仲係我生存落黎既唯一理由,我好難像冇得玩既世界,我點生存落去...哈哈!
玩左咁多年之後,我開始明白結果固然重要,但係過程更加重要。過程一定要開心或者開心過都好,如果連開心過都冇,結果再好都冇用。
打個比喻:假如我讀書次次拎第一,但係成個過程我完全唔enjoy亦令我好痛苦;拎第一又點,我唔會開心,我只會覺得應該或者覺得安慰,咁既結果對我黎講根本冇意義。
結果係點,唔一定可以控制;但係過程係點就掌握係自己手上。用玩既方式令過程變得有趣、enjoyable、開心,係我既處理生活同對任何事件既態度。
我在意輸贏,所以我係過程之中會全力以赴、會好認真。同樣地我都好在意過程開唔開心,辛辛苦苦到頭黎得個吉,自己又唔開心又輸餐懵...咁有乜好玩?!

呢家既我,已經知道玩既意義係咩,亦知點玩,就差在仲未完全識玩亦未完全能夠去面對輸、接受失敗。
我希望自己有一日可以將玩呢個精神係每件事上都可以發揮到淋漓盡致,同埋可以寬容面對輸贏。
所以我會努力做到自己既目標,玩到自己既目標。


i play ,therefore i live.