今夜，月光暝

有月娘e暗暝，1陣人作伙開講，2e人對話，ah 是家己一個邀請月娘獨白，攏真適合真對味真馬吉，kam m是？選擇用台語發聲、台文書寫，ti台語文教育欠缺e今a日，需要真大e勇氣，特別是30外歲e我，自讀冊開始hong禁止用台語講話，了後冊讀愈濟，台語愈be曉講，久來台語soah 變作kan-na是kap 真熟悉e人chiah 會自然ui嘴講出來e話，大部分攏是厝內底e人、故鄉e人，hit 分親密e感情，chim-a 我chiah 知影原來是因為阮有仝款e語言，ti心內互相認同，感覺阮攏是1家人，chiah 明白為啥麼日本人統治台灣，要求台灣人講「國語」（日語），國民黨統治台灣用擱卡酷刑e手段，強迫咱講「國語」（華語），hit 當時，Formosa 這塊美麗e島嶼，有台語、客語、有各種原住民語言…，無仝款e族群toh 用上濟人講e台語溝通，作生理、通婚攏無礙。我有1寡年紀khah 大e客家朋友，in e客語、台語攏講kah 足好足端的，in 若無講家己是客家身分，我ma掠準in 是Holo人。
國民黨e「國語政策」真正有夠成功，無幾10年e時間，美麗島嶼各種美麗e語言攏teh-beh 死死去，華語獨尊獨大，大部分e 人親像嘛真慣勢 ，tiam tiam 接受被扭曲e現象。

因為大部分e咱，對台灣e歷史攏無深深e認bat ，咱讀冊e時代，讀西洋歷史、讀中國歷史，台灣e歷史ui國民政府「播遷」來台開始讀起，地理擱卡害，中國大陸讀透透，鐵枝路按怎相接m知會hou老師拍，若台灣toh 無差，考試be考。
有1e講起來真悲哀e笑話，1e北一女e學生去花蓮，beh 坐火車轉來台北，m知愛「落南」ah 是「上北」，尾a敲電話問in 老父才知。

咱讀「國文」，文言文占多數，現代文學當中beh 尋台灣本土作家e作品，用指頭a拗擱嫌濟支。

胡適e白話文運動「我手寫我口」kam無hou咱啟示？有啦！只是咱hong騙講台語文無法度書寫！

你kam 知影台灣thong早e文字歷史是荷蘭人寫e？你kam 知in 統治台灣e時，有教咱書寫台灣本土e語言？基督教文明kap羅馬字就是in 留落來hou咱Formosa e財產。羅馬字母會凍拼寫咱島嶼e各種語言，比「ㄅㄆㄇ」擱卡好用，ti海外早已經證明，m知咱e政府擱躊躇啥麼？

本土語言是咱台灣人e特色，台灣e寶藏。ti文明進步e今a日，瀕臨絕種e動物，眾人攏知影愛ka保護，咱e母語kam 免搶救？

因為按呢，才有「自不量力」e我，抱著作義工e心情，ka天借膽開設台文台，今夜，月光暝kap 朋友分享我e台語文學人生。