2004-04-01 09:39:00A-chiak
木棉e 聯想
第1遍注意著木棉樹是讀國校a 3年e時，hit 1工kap 同學ti學校e 運動埕。
冬尾時a 風sng sng 叫，身軀邊1欉大樹a ，葉a 落 kah 光光光，樹身高大擱粗勇，樹枝好chhan 像天然e 衫篙 a ，提卡濟e 衫來吊ma 無夠看，曝被單kap 棉被擱卡無問題。
Tng 去了，我趕緊ka 這e 天大地大e 發現講hou 厝e人聽，叫媽媽緊種1欉木棉樹ti 埕尾，按呢寒人著免煩惱衫無teh 吊、吊be 乾。
厝nih e人聽我講了soah 笑kah 腹肚疼，擱ka 我摸頭殼看有發燒bou？
種木棉樹e 天才想法，當然ma 無得著採納，m koh，he 是我頭擺認bat木棉樹，擱知影伊有1e真sui e 名叫班芝。
自按呢，年年e 寒人.熱人.春天.秋天無仝e 季節，阮攏會注意著司令台邊a ，hit 2 欉親像teh khia 衛兵e 木棉。
阮ma bat 異想天開，招gin-a伴ti 木棉樹kha ，拾飛kah 滿四界e 棉a ，想講積積leh ，看有1 工會凍作1 領鋪棉e 外套bou。
升去li 國校a 5 年e ，老師愛我「朝會」唱國歌e 時，ti 台頂指揮，仝1e 時間，司儀ma 換作1 e 隔壁班e 查甫gin-a。he 是我頭擺注意著對面仝款khia ti 木棉樹kha e 你 。
一直到國校a 畢業，咱攏m bat 講過話，干單tak 工「朝會」e 時，遠遠sio 相。
了後，我親像隨風飛e 棉a ，飄落他鄉；親像天頂e 白雲，流浪天涯。
高2 hit 年，我轉學tng 來故鄉，想be 到soah 擱tu 著你，chit 1 擺咱m-na 仝班，上課我擱坐ti 你e正手peng 邊a 。天kha e kam 有hiah 呢tu 好e 代誌？kam 是天公伯a 巧妙e 安排？
咱好親像真久以前著互相sek-sai，真緊著變作好朋友。
Hit 陣，我是落魄天涯歸來e 遊子，m 知原來你是虎尾高中e 風雲人物，m 知你m-na gau 讀冊，鼓吹擱是樂隊內面pun 了siong 好e ，m 知你是真濟查某gin-a心目中e 白馬王子。
活動中心頭前有1 排木棉樹，黃昏e 時，樂隊攏ti hia e 空地a 練習。ui 教室e窗 a 遠遠看出去，會凍看著你ti 樹kha pun 奏e 模樣。你是眾人注視e 焦點。
Hit 年，木棉花開kah 特別sui ，1蕊1蕊柑a 色e 花，親像hou 1支1支手骨輕輕細膩phong 條著。滿樹e 花蕊擱親像柑a 色胭脂抹kah 厚厚厚e 嘴唇，開嘴大聲隨音樂合唱。
1首1首好聽e 台灣民謠，隨風吹送。「丟丟銅a 」 「西北雨」青春活潑，「雨夜花」「有酒矸通賣bou 」哀愁美麗。
夕陽kap 木棉花柑a 色e 色水互相輝映，講有偌sui ，著有偌sui 。
放學了後，阮常在留落來教室讀冊，1 無張持，目睭.耳孔. 歸e心思，攏會hou窗外e 樂聲kap 美景吸引。
花開花謝，著是花e 1 生。
年年花開花謝。Sui 擱短e 1 生。
了後，柑a 色e 嘴唇，日日聲聲句句探問闊bong bong e 天，人生有啥mih 道理？
天地無言，算是伊e 回答。
無奈，當時e 我1屑a toh 無法度體會天地e 教化。
生命e 議題，一直逼問我暗澹e 青春，加上考大學e 壓力，我e 心肝.目頭結歸khiu ，愁上加愁。
全班同學攏無暝無日teh 準備聯考，tak 工ti 學校e 時間siong 無有15點鐘，一切活動攏停止，ti 最後1年全力拚勢衝，向望會凍考條理想e 大學。
一向頇顢計算e 我，tu 著3角涵數sin cosin ，頭殼1粒頭2粒大，讀kah 艱苦債掛。
想著數學老師不時正khau 倒削，想著上大學e 美夢會毀ti 數學e 手頭，有1 工同學攏出去食暗頓e 時，我仆ti 讀冊桌a 放聲大哭。
你來a ！你輕聲呼hiam 我，叫我m 通傷心流目屎，你e 聲音柔和卻真有力。
「mai 管別人講啥mih ，我ka 你講讀數學e 撇步，日後你若tu 著問題，隨時問我」你用行動，實現你所講e 話。
你為我止痛，止我血流血滴e 傷口，你是我e天使，我e 貴人。
Hit 1年，謠言滿天飛，講咱是青梅竹馬，講咱是1對戀人，講…。
管汰別人講啥，咱全心全意為前程拍拚。
Tng 來故鄉教冊，是你siong 大e 心願。辛苦總算有代價，咱攏順勢考條心目中想beh 讀e 大學，你ma 實現你e 理想。
你是故鄉e 木棉，歲歲年年看顧年老e 父母。
木棉使我想著你。
年年木棉花開，我攏會想起咱之間美麗e 情誼。
我ka 思念kap 祝福寄託木棉，送hou 故鄉e 你。柑a 色e 嘴唇，是我1聲擱1聲殷勤e 探問，問故鄉e 點點滴滴，問守護故鄉e 你，一切kam平安順勢？
冬尾時a 風sng sng 叫，身軀邊1欉大樹a ，葉a 落 kah 光光光，樹身高大擱粗勇，樹枝好chhan 像天然e 衫篙 a ，提卡濟e 衫來吊ma 無夠看，曝被單kap 棉被擱卡無問題。
Tng 去了，我趕緊ka 這e 天大地大e 發現講hou 厝e人聽，叫媽媽緊種1欉木棉樹ti 埕尾，按呢寒人著免煩惱衫無teh 吊、吊be 乾。
厝nih e人聽我講了soah 笑kah 腹肚疼，擱ka 我摸頭殼看有發燒bou？
種木棉樹e 天才想法，當然ma 無得著採納，m koh，he 是我頭擺認bat木棉樹，擱知影伊有1e真sui e 名叫班芝。
自按呢，年年e 寒人.熱人.春天.秋天無仝e 季節，阮攏會注意著司令台邊a ，hit 2 欉親像teh khia 衛兵e 木棉。
阮ma bat 異想天開，招gin-a伴ti 木棉樹kha ，拾飛kah 滿四界e 棉a ，想講積積leh ，看有1 工會凍作1 領鋪棉e 外套bou。
升去li 國校a 5 年e ，老師愛我「朝會」唱國歌e 時，ti 台頂指揮，仝1e 時間，司儀ma 換作1 e 隔壁班e 查甫gin-a。he 是我頭擺注意著對面仝款khia ti 木棉樹kha e 你 。
一直到國校a 畢業，咱攏m bat 講過話，干單tak 工「朝會」e 時，遠遠sio 相。
了後，我親像隨風飛e 棉a ，飄落他鄉；親像天頂e 白雲，流浪天涯。
高2 hit 年，我轉學tng 來故鄉，想be 到soah 擱tu 著你，chit 1 擺咱m-na 仝班，上課我擱坐ti 你e正手peng 邊a 。天kha e kam 有hiah 呢tu 好e 代誌？kam 是天公伯a 巧妙e 安排？
咱好親像真久以前著互相sek-sai，真緊著變作好朋友。
Hit 陣，我是落魄天涯歸來e 遊子，m 知原來你是虎尾高中e 風雲人物，m 知你m-na gau 讀冊，鼓吹擱是樂隊內面pun 了siong 好e ，m 知你是真濟查某gin-a心目中e 白馬王子。
活動中心頭前有1 排木棉樹，黃昏e 時，樂隊攏ti hia e 空地a 練習。ui 教室e窗 a 遠遠看出去，會凍看著你ti 樹kha pun 奏e 模樣。你是眾人注視e 焦點。
Hit 年，木棉花開kah 特別sui ，1蕊1蕊柑a 色e 花，親像hou 1支1支手骨輕輕細膩phong 條著。滿樹e 花蕊擱親像柑a 色胭脂抹kah 厚厚厚e 嘴唇，開嘴大聲隨音樂合唱。
1首1首好聽e 台灣民謠，隨風吹送。「丟丟銅a 」 「西北雨」青春活潑，「雨夜花」「有酒矸通賣bou 」哀愁美麗。
夕陽kap 木棉花柑a 色e 色水互相輝映，講有偌sui ，著有偌sui 。
放學了後，阮常在留落來教室讀冊，1 無張持，目睭.耳孔. 歸e心思，攏會hou窗外e 樂聲kap 美景吸引。
花開花謝，著是花e 1 生。
年年花開花謝。Sui 擱短e 1 生。
了後，柑a 色e 嘴唇，日日聲聲句句探問闊bong bong e 天，人生有啥mih 道理？
天地無言，算是伊e 回答。
無奈，當時e 我1屑a toh 無法度體會天地e 教化。
生命e 議題，一直逼問我暗澹e 青春，加上考大學e 壓力，我e 心肝.目頭結歸khiu ，愁上加愁。
全班同學攏無暝無日teh 準備聯考，tak 工ti 學校e 時間siong 無有15點鐘，一切活動攏停止，ti 最後1年全力拚勢衝，向望會凍考條理想e 大學。
一向頇顢計算e 我，tu 著3角涵數sin cosin ，頭殼1粒頭2粒大，讀kah 艱苦債掛。
想著數學老師不時正khau 倒削，想著上大學e 美夢會毀ti 數學e 手頭，有1 工同學攏出去食暗頓e 時，我仆ti 讀冊桌a 放聲大哭。
你來a ！你輕聲呼hiam 我，叫我m 通傷心流目屎，你e 聲音柔和卻真有力。
「mai 管別人講啥mih ，我ka 你講讀數學e 撇步，日後你若tu 著問題，隨時問我」你用行動，實現你所講e 話。
你為我止痛，止我血流血滴e 傷口，你是我e天使，我e 貴人。
Hit 1年，謠言滿天飛，講咱是青梅竹馬，講咱是1對戀人，講…。
管汰別人講啥，咱全心全意為前程拍拚。
Tng 來故鄉教冊，是你siong 大e 心願。辛苦總算有代價，咱攏順勢考條心目中想beh 讀e 大學，你ma 實現你e 理想。
你是故鄉e 木棉，歲歲年年看顧年老e 父母。
木棉使我想著你。
年年木棉花開，我攏會想起咱之間美麗e 情誼。
我ka 思念kap 祝福寄託木棉，送hou 故鄉e 你。柑a 色e 嘴唇，是我1聲擱1聲殷勤e 探問，問故鄉e 點點滴滴，問守護故鄉e 你，一切kam平安順勢？