2003-12-03 13:06:00A-chiak
阿伯的笑容
這回，庄nih 作平安戲，阮轉去故鄉，車1入庄nih ，阮就看著阿伯坐ti7 「新」店仔頭顧店。
阿伯的笑容，好親像春風，溫暖阮久久堅凍、結霜的心，我掠準這世人，無法度擱再看著阿伯的笑容。
阿伯的kam2 仔店，永過ui3 舊厝soa2 去新厝，chim2-a2 ，擱ui3 新厝soa2 轉來舊厝。無kang7 的是，舊厝因為破擱舊-- 驚漏，擱重翻過，厝身敲掉，換搭作鐵厝。「新」店仔頭才落成無1禮拜，阮ma7 是頭pai2 見面。
Ti7 鐵厝，因為阮聽著阿伯失落真久--擱chhoe7 轉來的- -笑聲，hou7 我充滿激動kap 歡喜。
阿伯的笑容，是kam2 仔店的刊版，是阮美麗的記智。
阿伯的kam2 仔店，是庄nih 的「7-11」，是庄nih 唯一的店仔頭，賣的物件哩哩khok8-khok8 ，逐項攏有，數10冬來，提供濟濟利便。有人講笑ka7 「7-11」解說作本錢7箍賣11箍--搶人--的店，m7 koh ，阿伯的kam2 仔店是價數公道，薄利多銷。
阿伯的kam2 仔店，有阮成長的腳跡，我的gin2-a2 時代有1半是ti7 hia 過e5 。
阿伯m7 na7 對無父的阮特別疼thang3 ，對庄nih 的大大細細，kang7 款ma7 是滿滿e5 愛心相對待。逐工，阮看阿伯笑 hai-hai 對待來交關e5 人客。m7 管in 是來買e5 ，抑是來賒e5 ，in 攏會tang3 看著kang7 款e5 笑容。
阿伯m7 bat 講過看錢無重e5 話，m7 koh ui3 阿伯身上，阮知影啥物叫作淡泊名利。
印象中，庄nih e5 酒鬼阿慶a2 來買haiN3 頭仔，有幾若回攏空手轉去。阿伯m7 賣酒hou7 伊，擱苦勸伊m7 通飲酒，因為伊e5 酒品真bai2 ，是彼種飲酒了後，會起酒痟，睏ti7 路中央，擱會打某打囝e5 人。Gin2-a2 來買物a2 ，錢chah 無夠，阿伯會ka7 in 講欠幾箍，m7 koh 物件ma7 照hou7 in 。
m7 管社會按怎改變，阿伯的古意、善良卻是1sut a2 攏無變。
ti7 現代化的利便店、大賣場滿滿是，傳統kam2 仔店1間1間倒店的情形下，阿伯的kam2 仔店，猶原是庄nih 的人的頭1項選擇，因為阿伯的溫情kap 信任，是任何店無法度買著的。
行入kam2 仔店，阿伯隨theh8 飲料出來招待阮。
Kap 阿伯坐ti7 店仔頭開講，o-lo2 伊的店面看起來真舒適，伊對阮講：「錢我家己出e5 neh ！」伊的表情be7 輸gin2-a2 teh ka7 人展講：「汝看！我擱有柑仔糖」彼款。
阿伯總算ui3 後生失和的黯淡、悲傷、鬱悶的心情行出來，我真替伊歡喜。
阿伯有2個後生，大漢囝阿萬ti7 庄腳作穡，細漢囝阿誠自少年著去台北拍拚。
2兄弟a2 攏成家立業，娶某生囝，日子ma7 過了be7 bai2 。
阿萬兄真拚勢，天公伯a2 ma7 真照顧，連續幾若年，阿萬兄的西瓜園攏有好收成。穡na2 作na2 闊，起新厝，hak 家伙。阿伯的kam2 仔店ma7 是ti7 彼陣soa2 過新厝e5 。
阿誠兄ma7 真gau5 ，孤人去台北拍拚，ui3 1個作裝潢的工人，學kah 會曉室內設計，擱會曉包工程，踏著台灣建築業上發達的時機，趁真濟錢。ti7 台北市區買厝，「5子登科」無任何欠缺。阿萬兄的新厝、阿伯的kam2 仔店，攏是阿誠兄轉來設計、裝潢e5 。2兄弟a2 本底感情be7 bai2 ，上ma-chih 的時，擱bat 參詳beh ka7 舊厝歸排敲掉，兄弟a2 作伙起大厝。Hit 陣，阿伯講啥物ma7 m7 答應敲掉舊厝，擱起新厝。阿伯認為已經有夠通toa3 a2 ，擱再講歸排舊厝包括公e5 地- - 祖先留落來無分開e5 地，有資格持分e5 人真濟，雖然in 攏搬走a2 ，m7 koh ，阿伯m7 願侵佔別人e5 權利。人講：「打虎掠賊親兄弟」ti7 作伙起大厝這項代誌頂面，in 2兄弟a2 上seng5 親兄弟，m7 管阿伯按怎反對，2個人一直攏m7 死心。一直到後來，阿萬兄中風，腦筋piak 去，這項計畫chiah m7 bat 擱講起。
阿萬兄中風，toa3 院1段時間，出院了後，ti7 厝nih 作復健，ui3 無法度講話到慢慢會tang3 家己行tin2 動，生活起居攏阿m2 teh 照顧。阿萬兄唯一的後生阿志去作兵，猶未退伍，田nih 的穡頭太濟太闊，阿萬嫂kap in hia e5 查某囡仔作be7 去，阿伯有歲a2 ，粗重e5 ma7 無法得。參詳的結果是叫阿誠兄轉來鬥相工。
到 taN ，阿伯ma7 m7 知當初ka7 細漢後生叫轉來是m7 是錯誤e5 決定。
阿誠兄轉來了後，田nih 的穡頭，全部擔起來。阿萬嫂kap in hia e5 查某囝，tu2 開始擱有去田nih 作穡，了後阿萬嫂愛著poah8-kiau2 ，厝nih 的khang-khoe3 ，田nih 的穡頭，攏m7 管。阿伯、阿m2 攏管伊無法得，伊ti7 店仔頭罵天罵地，罵翁廢人，伊唯一的寄望是等in 後生轉來。
阿志總算退伍轉來a2 ！
m7 koh ，轉來竟然是家庭革命的開始。
阿萬嫂a2 親像chhoe7 著靠山，擱親像是慈禧太后lak 權，支使原本善良的阿志變1個款。
阿誠兄m7 知是作穡作出興趣，抑是建築業無過去時機好，m7 若無愛轉去台北，連in 某ma7 搬轉來toa3 ，ka7 台北的厝，留hou7 囝兒序細。
雙peng5 為著家己的利益，為著分家伙，代先是冤家量債，了後，比生分人koh 卡害，未輸2國冷戰，m7-na7 歹面相看，tak8 項攏tiam7 tiam7 a2 kap 對方輸贏。擱滿si3-ke3 去講hou7 人聽，講對方按怎可惡、按怎卑鄙，全無帶念手足之情，koh 講序大人按怎偏心，si3-ke3 掀手蹄仔hou7 人看 ，無想著通庄攏知家庭未和，叫序大人beh 按怎ti7 庄裡khia7 起。
人性的考驗，看來2方面攏無通過，考試單紅ki3-ki3 ，慘慘慘。
可憐的是2個老e5 ，be7 輸石磨仔心，磨仔磨。
阿伯得著肝病toa3 院，ti7 病院1度昏迷，佳在，度過難關，順利平安轉來。2兄弟並無因為按呢，有任何覺醒，阿伯的精神kap 身體攏受著真大的折磨。看著阿伯倦tauh-tauh 、軟kauh-kauh ，倒ti7 眠床，實在真m7 甘。阮去看阿伯，陪伴阿伯講話，真是天下父母心！阿伯煩惱的m7 是家己的身體，是彼2兄弟oan-ke 當時會收煞。阿伯真感慨，講家己1世人無kap 人計較，m7 ka7 人phiN ，是按怎2兄弟計較東計較西，相爭家伙，擱kheng5-hun 講序大人卡疼對方，無疼家己。
阿伯經過戰亂，死裡逃生，對生命、對人生，只有感恩、知足，只求1家平安。
生活富裕的咱，真濟人卻是m7 知啥物是作人的義理，擱卡免講感恩、知足。
我祈求阿伯的身體，恢復老康健。心肝放hou7 清，自在過日。
Ti7 店仔頭坐，阮重溫兒童時的夢。
阿伯、阿m7 是阮姊妹a2 紅嬰仔時義務的「奶母」，一直到讀幼稚園阮才toe3 阿母去學校。阮食的糖仔餅是阿伯hou7 阮e5 ，阮sng2 e5 chhit-tho5 物a2 是阿伯賣e5 ，阮kheh e5 頭1截甘蔗是阿伯削e5 …，到讀國小e5 時phang5的 ou -bak8-kheh ma7 是阿伯e5 。阮ti7 阿伯的店，看布袋戲、歌仔戲，ti7 阿伯的店ka7 阿伯鬥kauh 檳榔、賣檳榔。想著chia ，阮kap 阿伯講笑，講伊chia 有全台灣尚幼齒的「檳榔西施」，阿伯1時gang7 去，「thah8 有啦？2個老人nia7 ！」等阮講當年阮姊妹a2 就是全台灣尚幼齒的「檳榔西施」，1時笑聲淹滿店頭。
阿志的某過來，看著阮，叫1聲阿姑、姑丈，店仔的物件提咧，真自然著行走。阿誠兄ma7 過來提薰kap 檳榔，好親像無代誌kang7 款。阿伯講in 隨人請隨人的人客，辦kah 真chheN-chhau 。阮問阿伯暗頓食未？阿伯講：「有啦！2peng5 攏去食淡薄仔！」唉！趁錢家己te7 ，beh 用店仔提！kap 過去1sut a2 攏無改變。
這2兄弟a2 欠阿伯1個公道。
「阿伯！請汝著保重！」beh 離開前，我擱1擺祝福我的阿伯。
2003.11.22
阿伯的笑容，好親像春風，溫暖阮久久堅凍、結霜的心，我掠準這世人，無法度擱再看著阿伯的笑容。
阿伯的kam2 仔店，永過ui3 舊厝soa2 去新厝，chim2-a2 ，擱ui3 新厝soa2 轉來舊厝。無kang7 的是，舊厝因為破擱舊-- 驚漏，擱重翻過，厝身敲掉，換搭作鐵厝。「新」店仔頭才落成無1禮拜，阮ma7 是頭pai2 見面。
Ti7 鐵厝，因為阮聽著阿伯失落真久--擱chhoe7 轉來的- -笑聲，hou7 我充滿激動kap 歡喜。
阿伯的笑容，是kam2 仔店的刊版，是阮美麗的記智。
阿伯的kam2 仔店，是庄nih 的「7-11」，是庄nih 唯一的店仔頭，賣的物件哩哩khok8-khok8 ，逐項攏有，數10冬來，提供濟濟利便。有人講笑ka7 「7-11」解說作本錢7箍賣11箍--搶人--的店，m7 koh ，阿伯的kam2 仔店是價數公道，薄利多銷。
阿伯的kam2 仔店，有阮成長的腳跡，我的gin2-a2 時代有1半是ti7 hia 過e5 。
阿伯m7 na7 對無父的阮特別疼thang3 ，對庄nih 的大大細細，kang7 款ma7 是滿滿e5 愛心相對待。逐工，阮看阿伯笑 hai-hai 對待來交關e5 人客。m7 管in 是來買e5 ，抑是來賒e5 ，in 攏會tang3 看著kang7 款e5 笑容。
阿伯m7 bat 講過看錢無重e5 話，m7 koh ui3 阿伯身上，阮知影啥物叫作淡泊名利。
印象中，庄nih e5 酒鬼阿慶a2 來買haiN3 頭仔，有幾若回攏空手轉去。阿伯m7 賣酒hou7 伊，擱苦勸伊m7 通飲酒，因為伊e5 酒品真bai2 ，是彼種飲酒了後，會起酒痟，睏ti7 路中央，擱會打某打囝e5 人。Gin2-a2 來買物a2 ，錢chah 無夠，阿伯會ka7 in 講欠幾箍，m7 koh 物件ma7 照hou7 in 。
m7 管社會按怎改變，阿伯的古意、善良卻是1sut a2 攏無變。
ti7 現代化的利便店、大賣場滿滿是，傳統kam2 仔店1間1間倒店的情形下，阿伯的kam2 仔店，猶原是庄nih 的人的頭1項選擇，因為阿伯的溫情kap 信任，是任何店無法度買著的。
行入kam2 仔店，阿伯隨theh8 飲料出來招待阮。
Kap 阿伯坐ti7 店仔頭開講，o-lo2 伊的店面看起來真舒適，伊對阮講：「錢我家己出e5 neh ！」伊的表情be7 輸gin2-a2 teh ka7 人展講：「汝看！我擱有柑仔糖」彼款。
阿伯總算ui3 後生失和的黯淡、悲傷、鬱悶的心情行出來，我真替伊歡喜。
阿伯有2個後生，大漢囝阿萬ti7 庄腳作穡，細漢囝阿誠自少年著去台北拍拚。
2兄弟a2 攏成家立業，娶某生囝，日子ma7 過了be7 bai2 。
阿萬兄真拚勢，天公伯a2 ma7 真照顧，連續幾若年，阿萬兄的西瓜園攏有好收成。穡na2 作na2 闊，起新厝，hak 家伙。阿伯的kam2 仔店ma7 是ti7 彼陣soa2 過新厝e5 。
阿誠兄ma7 真gau5 ，孤人去台北拍拚，ui3 1個作裝潢的工人，學kah 會曉室內設計，擱會曉包工程，踏著台灣建築業上發達的時機，趁真濟錢。ti7 台北市區買厝，「5子登科」無任何欠缺。阿萬兄的新厝、阿伯的kam2 仔店，攏是阿誠兄轉來設計、裝潢e5 。2兄弟a2 本底感情be7 bai2 ，上ma-chih 的時，擱bat 參詳beh ka7 舊厝歸排敲掉，兄弟a2 作伙起大厝。Hit 陣，阿伯講啥物ma7 m7 答應敲掉舊厝，擱起新厝。阿伯認為已經有夠通toa3 a2 ，擱再講歸排舊厝包括公e5 地- - 祖先留落來無分開e5 地，有資格持分e5 人真濟，雖然in 攏搬走a2 ，m7 koh ，阿伯m7 願侵佔別人e5 權利。人講：「打虎掠賊親兄弟」ti7 作伙起大厝這項代誌頂面，in 2兄弟a2 上seng5 親兄弟，m7 管阿伯按怎反對，2個人一直攏m7 死心。一直到後來，阿萬兄中風，腦筋piak 去，這項計畫chiah m7 bat 擱講起。
阿萬兄中風，toa3 院1段時間，出院了後，ti7 厝nih 作復健，ui3 無法度講話到慢慢會tang3 家己行tin2 動，生活起居攏阿m2 teh 照顧。阿萬兄唯一的後生阿志去作兵，猶未退伍，田nih 的穡頭太濟太闊，阿萬嫂kap in hia e5 查某囡仔作be7 去，阿伯有歲a2 ，粗重e5 ma7 無法得。參詳的結果是叫阿誠兄轉來鬥相工。
到 taN ，阿伯ma7 m7 知當初ka7 細漢後生叫轉來是m7 是錯誤e5 決定。
阿誠兄轉來了後，田nih 的穡頭，全部擔起來。阿萬嫂kap in hia e5 查某囝，tu2 開始擱有去田nih 作穡，了後阿萬嫂愛著poah8-kiau2 ，厝nih 的khang-khoe3 ，田nih 的穡頭，攏m7 管。阿伯、阿m2 攏管伊無法得，伊ti7 店仔頭罵天罵地，罵翁廢人，伊唯一的寄望是等in 後生轉來。
阿志總算退伍轉來a2 ！
m7 koh ，轉來竟然是家庭革命的開始。
阿萬嫂a2 親像chhoe7 著靠山，擱親像是慈禧太后lak 權，支使原本善良的阿志變1個款。
阿誠兄m7 知是作穡作出興趣，抑是建築業無過去時機好，m7 若無愛轉去台北，連in 某ma7 搬轉來toa3 ，ka7 台北的厝，留hou7 囝兒序細。
雙peng5 為著家己的利益，為著分家伙，代先是冤家量債，了後，比生分人koh 卡害，未輸2國冷戰，m7-na7 歹面相看，tak8 項攏tiam7 tiam7 a2 kap 對方輸贏。擱滿si3-ke3 去講hou7 人聽，講對方按怎可惡、按怎卑鄙，全無帶念手足之情，koh 講序大人按怎偏心，si3-ke3 掀手蹄仔hou7 人看 ，無想著通庄攏知家庭未和，叫序大人beh 按怎ti7 庄裡khia7 起。
人性的考驗，看來2方面攏無通過，考試單紅ki3-ki3 ，慘慘慘。
可憐的是2個老e5 ，be7 輸石磨仔心，磨仔磨。
阿伯得著肝病toa3 院，ti7 病院1度昏迷，佳在，度過難關，順利平安轉來。2兄弟並無因為按呢，有任何覺醒，阿伯的精神kap 身體攏受著真大的折磨。看著阿伯倦tauh-tauh 、軟kauh-kauh ，倒ti7 眠床，實在真m7 甘。阮去看阿伯，陪伴阿伯講話，真是天下父母心！阿伯煩惱的m7 是家己的身體，是彼2兄弟oan-ke 當時會收煞。阿伯真感慨，講家己1世人無kap 人計較，m7 ka7 人phiN ，是按怎2兄弟計較東計較西，相爭家伙，擱kheng5-hun 講序大人卡疼對方，無疼家己。
阿伯經過戰亂，死裡逃生，對生命、對人生，只有感恩、知足，只求1家平安。
生活富裕的咱，真濟人卻是m7 知啥物是作人的義理，擱卡免講感恩、知足。
我祈求阿伯的身體，恢復老康健。心肝放hou7 清，自在過日。
Ti7 店仔頭坐，阮重溫兒童時的夢。
阿伯、阿m7 是阮姊妹a2 紅嬰仔時義務的「奶母」，一直到讀幼稚園阮才toe3 阿母去學校。阮食的糖仔餅是阿伯hou7 阮e5 ，阮sng2 e5 chhit-tho5 物a2 是阿伯賣e5 ，阮kheh e5 頭1截甘蔗是阿伯削e5 …，到讀國小e5 時phang5的 ou -bak8-kheh ma7 是阿伯e5 。阮ti7 阿伯的店，看布袋戲、歌仔戲，ti7 阿伯的店ka7 阿伯鬥kauh 檳榔、賣檳榔。想著chia ，阮kap 阿伯講笑，講伊chia 有全台灣尚幼齒的「檳榔西施」，阿伯1時gang7 去，「thah8 有啦？2個老人nia7 ！」等阮講當年阮姊妹a2 就是全台灣尚幼齒的「檳榔西施」，1時笑聲淹滿店頭。
阿志的某過來，看著阮，叫1聲阿姑、姑丈，店仔的物件提咧，真自然著行走。阿誠兄ma7 過來提薰kap 檳榔，好親像無代誌kang7 款。阿伯講in 隨人請隨人的人客，辦kah 真chheN-chhau 。阮問阿伯暗頓食未？阿伯講：「有啦！2peng5 攏去食淡薄仔！」唉！趁錢家己te7 ，beh 用店仔提！kap 過去1sut a2 攏無改變。
這2兄弟a2 欠阿伯1個公道。
「阿伯！請汝著保重！」beh 離開前，我擱1擺祝福我的阿伯。
2003.11.22
下一篇：木棉e 聯想