2019-03-06 02:26:14燕仔
從藍帶學校走到甜點職業戰場-第五回
上回結束前話要講怨氣衝天既簽証，咁岩尋日我又去審批處度被打槍，怨氣指數再提升，好適合分享同發洩下。
相信每位係巴黎經歷一段美好時光既同孩，不論你係學生，工作，結婚，創業，定咩原因好，只要你想要留落黎，都一定會經歷辦簽証同續簽証既moment，係警察局留下唔多唔少既腳印。
先講下我仲係學生身份既時候，第一次辦入境法國(以學生身分長期居留)係要去香港辦既，因為法國駐港澳大使館係香港個邊，而且仲要同campus france約埋面試時間，通常都會係同一日做埋唔使走兩轉，佢地兩個機構又係樓上樓下咁都幾方便，而基本上只要你按時出現，帶齊所有材料，基本上都無咩問題既，而我既課程大約係7個月，當時既簽証大概俾左我10個月時間左右。
我當初到步巴黎時住係小巴黎15區，課程結束後因應實習就搬左去92省大巴黎既nanterre， 係巴黎，搞簽証續期最緊要係地址住邊，如果住15區就係番小巴黎既警察局搞，如果住大巴黎既就去番自己相應既區域既警察局(prefecture, 移民局)，呢邊搞簽証地方都係叫警察局，但查實係類似澳門既移民局(幫非本地居民辦理証件既地方)，真正既警察局呢邊係有police同commisariat。然後唔同地區既警察局辦事效率同刁難程度各有不同，我有朋友試過係92省南邊既sous prefecture係風雨中排左8粒鐘以上，亦有聞說係Hay les rose既警察局要朝早4點開始排，必須準備足夠水分糧食，有朋友既朋友排左兩次4點都唔成功後決定回國唔再排，難怪以前有人會俾錢請人幫手排隊咁癲。
我第一次辦簽証續期就係92省nanterre警察局辦既，當時傻下傻下咁第一次預約去到文件又有問題，只好被打退堂鼓再預約第二次就順利辦好，係第一次被退件既時候佢有幫我寫相臨時証明，第二次正式辦理既時候就有一張三個月既臨時居留(recepisse)，而証件大約係呢三個月內就出到，張臨時居留recepisse就好似澳門既行街紙咁，係如同正式証件既效力，拎住佢先可以離開法國番澳門渡個假再番去，如果無呢張紙咁我一旦番左澳門，居留又過左期，就算我再番去就只能係旅遊身分而唔係學生。
作為學生身分續期，你可以係用學校註冊証明或者有效實習合同(convention de stage)作為續期理據。第一次續期我係用六個月既實習合同，當時好好彩佢批左我一年既簽証，所以實習結束我就可以工作。係法國係容許外地學生每年工作不超過964小時既，所以即使學生身份都可以工作賺外快，只係唔可以超過規定時數。後來我下定決心想繼續係巴黎闖蕩幾年，所以每年續期就會報讀語言學校，用註冊証明黎續期。我係nanterre都住左4年，之後每年續期都係係個度，大致上都無咩問題。個度都採用網上預約制，大約可以約到下個月或兩個月後既時間，不過後來92省既sous prefecture發生火災，令到佢地個邊既人都要過黎nanterre辦，聞說之後預約都真係要提早四五個月，同埋排隊既人都比以前多左，我後來搬左所以都唔係太清楚佢地依家咩環境，但總括過往經驗算係唔錯既。我都有朋友話當初因為知道nanterre既簽証較易辦所以搬黎呢度。
不過我都有聽講過係日本女仔同法國人結婚，係nanterre辦簽証就搞左年幾兩年都無下文所以就搬左去小巴黎住，個邊效率高N倍咁話。我只能講呢D都係講彩數既，可能我既簽証運係前幾年用完，真正既戲玉源於我要轉身份，由學生轉為工作簽証。
我工作既一間餐廳，因緣際遇下我獨自捍下甜點重擔，於是請求chef幫我辦理轉簽証，但餐廳行政人員唔識搞，係朋友介紹下，我地聘請一位專門幫外國人搞工簽文件既專業人士幫手搞，費用都係我出既。一開始我地有個小小既meeting，我、CHEF、專業人一齊開既，大概交代左整個程序，費用等等，之後就正式開始搞。
而我係轉簽証成件事犯最大錯誤就係信錯左呢條友，當時我手頭上既學生簽明年1月到期，而係9月份開始搞，專業人拍心口話11月就會出到，無問題既，我都覺得就算俾佢拖慢左，半年都應該出到喇，但原來效率低係低到不能想象，當時既我太天真太傻。原來個專人拖到11月先真係寄件入警察局，後來12月中我收到警察局email話我地址有問題，我將email forward俾佢佢拖左成個月先回應，甚至去到1月分我簽証要過期，都係掉低D文件同佢助手陪我去警察局續臨時居留。
我當時已經好氣憤，不過見佢最後都好體面咁回覆左警察局，我以為順利過渡，點知係3月餐廳收到審批處(La direccte)既信件，需要我補交係巴黎一切學術文件，我將文件全部交俾餐廳行政同專業人，佢都實牙實齒話已經補交番所有文件，如是者我第二張臨時居留大約係7月份到期，我6月中左右去警察局問話仲未有消息，佢地直接叫我去審批處(La direccte)度問，亦都係我第一次踏足呢個地方，估唔到接待處既人查電腦時同我講話佢地一直無收到我補交既文件。What the .....! 我即時炮轟專業人，佢就開始解釋話審批處入面邊個受傷呀休假呀總之就無王管咁話，食屎吧，一個政府機構一人有事全局停運咁厲害你真係當我傻既咩。
呢樣都算，最氣憤係7月份去警察局再續臨時居留，當時我係去cite universite，我由朝早9點定10點排到中午12點左右，佢地D人出黎話叫我到1點番黎再排，咁我再番去已經叫做係排頭幾個既，我排到入去已經差唔多3點幾，之後佢同我講話，依家轉換身份(學生簽轉工作簽)唔再係度辦，要去cite個邊，What?!你唔早講，係度浪費別人時間，當時我再趕去cite已經太晏，佢地收4點所以唯有第二朝再去排。個日係我人生中排最耐隊又最on9既一次。
我先剖析下點解警察局可以排咁耐，首先有兩群人既，一群係已經預約左既人(rendez-vous)，一群係好似我呢D無預約就踩過去詢問(rensignement)。佢地先優先處理已預約既人，無可厚非，中間有時間再應籌下無預約既人，所以我地呢群人條隊係郁很好慢，當時係7月天氣好熱仲要係出面晒住咁排，我曬到膊頭甩皮。排到入去就會見到咁慢速既真相，係接待處有4個位4部電腦，有3個人，有1個係做野既(呢個做野既都好低效，間唔中又走出走入咁)，另一個係隔離吹水，另一個係隔離學野觀摩咁。個個做野既人要預約既人拎晒所有資料出黎check，所以每個都check好耐，即使預約左既人都要排一輪，我地呢群無預約既就好無奈，其實check資料唔係佢既工作，預約左你俾個籌佢叫佢入去等counter叫，D文件又係counter會重新check一次，咁何解要咁on9同一件事做兩次浪費別人生命。到佢同我講唔係呢間警察局既時候我真係晴天pig pig，好彩第二日去cite個邊就順利好多。
如是者過埋8月暑假，我再去審批處度問，我既文件係9月5號先正式被審閱，痴線，拖左差唔多成年先開始審，都算吧，希望佢審快D就好，係10月份我再續多次臨時居留，大概11月我就再去審批處都問，我既文件被無理由拒絕左，當時我仲要咁岩撞到個位專業人，可謂冤家路窄，佢仲話佢之前已經大概知道件事，由於係無理由拒絕，連正式文件都唔會出。又係一件on9事，我係澳門都係做人力資源都有辦過唔少外地僱員既簽証申請，如果係拒絕唔批既肯定會有一大段理由塞住你把口，邊可能話無理由拒絕，我覺得真係法國人先諗到出黎，你求其講話失業率太高或我經驗不足CV唔靚仔我都仲覺得佢地有做下野，但你一句無理由咁好明顯係敷衍了事。專業人解釋完佢就話會寫信詢問原因要求重審，唉，又唔知等幾耐，接著大概12月底專業人話我既文件被重新審閱，大約1月就同我講話我既文件被通過左。
哇!漫長既簽証抗戰終於結束，拿，又真係唔好開心得咁早，係佢同我講完我去警察局同審批處查問，佢地都係咩都唔知，之後我番澳門過完年番巴黎，上禮拜再去警察局問佢地仲未收到我既文件，尋日去審批處度問，電腦資料係無顯示我既文件已通過左，負責人又唔係度，我留左電郵同電話都無收到回覆。哈哈哈，咁即係點，到底係專業人吹水自篇自導自演定係政府部門update資料同運送文件速度過低，謎團尚未解開。
如果文件真係通過左，審批處會將已通過既通知書SEND去警察局，之後警察局會約我去打指模同搞証。但我一直都未等到警察局既通知，亦都跑過N次警察局同審批處，每次去完心情都會好沉重，係對於呢D低效率既政府部門既無奈，係澳門係絕對無可能，我係澳門去過移民局去過人資辦，都未試過咁低效同低B。好心法國人就智能化少少，每份申請文件俾個barcode可以上網查詢進度，下下咁得閒踩上門咩，仲要審批處對外開放時間只有禮拜一二四既朝早9點半到12點，大佬咁嘆你仲想點，認真少少工作喇。
好喇~我既簽証革命尚未成功，黎緊又差唔多時間要去續臨時居留，個位專業人真係從來無陪過我去辦臨時居留，我有朋友由學生轉自由職業者身份都有律師陪同，而且3、4個月就批到，所以我既經驗唔可以套用全世界身上，祝願係巴黎既同孩都可以順順利利辦到簽証，都好多謝陪我排隊既男朋友同所有聽我呻安慰我支持我鼓勵我既好朋友。