我佇一个群組做民調，問逐家：會感覺日子過了無聊無？

一位講伊幾十年來固定的時間去上油畫課，有時也會去衛武營看表演，袂感覺無聊。一个講伊不時四界逐花、看花，也一定會看某一个頻道的日本劇，和某一个頻道西洋探偵片抑是警匪片。「我攏設定預錄，節目播出的時無佇厝，轉去就會當看。有遐濟電影、連續劇通看，袂感覺無聊啊。」

有影，伊自少年就過看花、錄/看影劇的日子。到今，竟然猶愛看探偵片和警匪片！伊的體力嘛無人綴會著，佇Line分享的攏是伊一四界走跳的相片。不過，我捌詼*伊，翕相*的姿勢嘛小變化一下。

一个講伊逐早起佇公園教人做氣功，家己健康，也幫助別人健康，好過日，心情也充實；轉去厝，攢*三頓，摒掃，看電視；無冗剩時間通無聊。

不過，若講上袂無聊，活甲真滿足的人可能是志工。一个朋友每禮拜有一日去藝術館做導覽，一日去教無受過偌濟教育的老歲仔寫大字、做手工。為著這个功課，伊愛想空想縫，看啥款勞作序大人有興趣；閣揣一寡無路用的材料，教in利用廢材創作。伊真用心，老歲仔耍甲真歡喜。

這个早起，一位朋友拍電話來破豆，話講足久，閣無重點。我想欲換較實際的話題，因為我拄仔做過骨密度檢測，就問伊做過無？伊講無，毋過，骨科醫生講伊的骨質無偌好，開一種藥仔予伊食，但是講喙齒無好的人無適合食彼款藥仔，會傷著牙槽骨；伊的阿姊，一日腰脊骨足酸足疼，醫生共伊注骨泥，隨好起來；伊一个厝邊，曲痀，徛袂直，一定是骨頭冇*去矣；彼位厝邊，最近倩一个外勞，足骨力，毋但照顧病人，嘛共伊厝內摒甲足清氣；伊的查某囝，嘛真體貼，三兩工就買好料的轉來予爸母食；伊慣勢佇某市場買便菜……。

看這个範勢，愛過誠久伊才有可能講煞；揣著一个閬縫，我問伊，會感覺日子過了無聊無？

伊講：「這陣，十點外矣，我猶未食早頓呢，拍兩通電話，一早起就過去矣，哪有時間無聊？」

詼（khue）：虧

翕相（hip-siòng）：拍照

攢（tshuân）：張羅

冇（phànn）：鬆軟

《文訊雜誌》2023/12