電腦亂畫圖

BBC旅遊版一條新聞，用「直直咧道歉的島」，來分析台灣的『不好意思』文化。報導內講無論是佇餐廳叫服務生、共老闆會失禮，抑是佇台北捷運落車、上車的時，這句真捷（常）聽著。

有影，一四界會聽著人講這四字。頂日我去便利商店，短短幾分鐘，就聽著店員共我講三遍。一遍是講予我等（其實等無半分鐘），另外兩遍是因為啥，袂記得。彼日，我一時家婆，共伊講：「毋免『不好意思』，你做了真好。」

彼位少年店員無疑悟有人會按呢反應，煞楞一下。我也感覺家己多事，人本來講慣勢，也可能是照一定的順序講話、做代誌，予我插話，伊的SOP煞亂去。

有一擺，較嚴肅，我和兩位朋友佇西餐廳食飯，餐廳的服務生逐遍出菜、收盤，攏講一遍『不好意思』。解說菜色時，也講一遍；所以食一頓飯，這四字聽歹算遍。In是為著「攪擾」人客會失禮，毋過，直直按呢講，顛倒予人感覺噪耳；有時用笑容抑是手勢表達敢毋是較好？彼日，在座的K當咧發表高論的時，一遍一遍予人插話，一時擋袂牢，大聲講：「這是你的工課，毋免直直講『不好意思』！」K本來就上氣人做代誌無效率，無耐性聽人講無重點的話；莫怪發脾氣。這聲，害彼位服務生正經足歹勢。

倚『不好意思』台語的「歹勢」，也不時聽著人講。「歹勢，借過。」「歹勢，我聽無清楚，請閣再講一遍。」

其實，台灣人講閣較濟的可能是『謝謝』、「多謝」。坐公車，上車、落車，共司機說多謝；買豆腐、買便當，共生理人說多謝；食飯，服務生出菜、共你斟水，說多謝；說多謝的機會真濟。幾若年前，讀過一篇文章，一位中國來的人講台灣人的禮數真虛華，明明是予生理人趁錢，竟然也咧感謝伊。

當然愛感謝，人共你服務啊。其實，不時雙方攏說多謝，毋是單方面講。

這就是上好的「台灣風景」。

 《文訊》2023三月號