頂日想著菜瓜水，問我時常去買菜的小農in有收菜瓜水無？伊講彼愛菜瓜收成煞、藤欲剉掉的時才會當收。

「不過，這兩年，無愛閣收矣。阮翁嫌費氣，收菜瓜水愛暗頭仔去承（sîn，承接），日頭猶未出來就收起來；一日一日沓沓仔承，一枝藤可能才有半塑膠罐仔。驚有蟲飛入去，逐遍閣愛用塑膠布共罐仔喙封予好。」

   伊問我菜瓜水欲創啥？我講熱天時uì（從）外口入門面燒唿唿，用彼來抹面足爽快。

伊講in大家眠床頭攏囥（khǹg，放）一罐，早時起來就啉兩喙。「哇，彼毋是足冷？」伊講著啊，退火清熱化痰。

真濟年前，人予我菜瓜水的時，共我講囡仔若發燒，會當予伊啉。我毋敢，驚會歹腹肚：用來抹面，較好勢。尤其熱天時，無論講甲偌好的保養品，一下抹就流汗；菜瓜水是毋是會予皮膚變幼，我毋知，至少抹落去袂流汗，閣會予面肉有一點仔澹（濕），袂絚絚（ân，緊）。

聽小農按呢講，想講今年無希望矣；好佳哉伊講伊猶有一桶舊年承的，會當分一寡予我。我欲共伊買，伊講無賣，相送。

天然的菜瓜水貯（té，盛裝）佇清氣的矸仔內，袂歹去。第二工， 我趕緊提一个矸仔去，順紲提一塊手工雪文（香皂）送伊。

《人間福報》2023/3/31