去菜市仔買過年廳頭欲插的花。

以前，會去花市買較奇巧、較有特色的；這幾年，感覺照傳統做較簡單，免徛佇十花五色的花面頭前傷腦筋。武漢肺炎了後，也罕得去花市矣。

一位太太央賣花的替伊配劍蘭和無仝色的菊仔花；這是過年插廳頭上普遍的。伊講in大家（婆婆）攏一个矸仔插兩枝劍蘭，我講毋是愛奇的（單數）？伊隨問老闆愛插幾枝才著？老闆講無一定愛仝款的花奇數，幾若種插做伙，鬥起來奇的就好。第一遍聽人開破甲遮爾開明體貼，我共記起來。老闆閣講：「像我tsit-má（現在）無仝的花鬥五枝，就是五福臨門。」

彼位太太講伊拜神明、拜祖先攏照序大的做。我笑，「我這陣就是阮兜的序大。」伊講伊也是。「毋過，阮大家雖然過身十外年矣，我猶是照伊的方式拜，傳統種佇頭殼底矣。」

毋知in大家有像伊遐爾頂真無？伊竟然厝內花矸的寸尺量好、閣紮布尺來量花枝的長度。

這日，除了廳頭的花，我也買一把「銀柳」。

銀柳用台語講，親像「銀兩」；過年插，有招財進寶的意思。甚至有人講銀柳的枝真直，有文人清高的風骨；銀柳的白絨花若毛筆，對文采功名也會當幫贊。

這款講法，真趣味。天生萬物，予人號名、分類，閣予人講一寡有的無的；橫直是好話，in應當袂反對。

我買銀柳，毋是欲招財，也毋是希望伊對我的寫作文采有幫助，只是欲予厝內較有過年的氣氛。

阮兜鞋橱頂頭磚仔色的大甕本來就是插銀柳，疫情了後，囡仔入門，就紲手共喙罨勾佇一粒一粒白色的花苞頂頭；久來，焦燥的花苞，就按呢一粒一粒落去。

後來，我用樓頂九芎仔的焦枝來代替銀柳，閣用朋友送的才三吋長、細細的菜瓜蒲、焦燥的木玫瑰和猴麵包樹的花托來共伊「造景」，伊就按呢變做一欉有時代感的「喙罨樹」。

這工，共銀柳和九芎仔枝插做伙，閣共過年前朋友予我的作品：寫的「兔福」、鉸的「春」和摺的鳳凰提來鬥鬧熱；喙罨樹就變甲愈媠，愈有氣質。

這欉喙罨樹，和傳統完全無關係，是我這位「序大」開創的。