禮拜早，阮先生竟然徛（khiā，站）袂起來。我驚一大趒，高血壓攏有食藥仔控制啊。叫伊雙手攑起來，雙跤攑起來，無問題；量血壓，正常；講話無各樣（異樣），喙也無歪，所以毋是中風。

毋過，房間有開燒氣，哪會猶咧喝寒？提耳溫銃來量，38度。應當是感冒發燒矣。

後生轉來，我問伊去佗一个病院較好？爸爸耳空有較重，是毋是去耳鼻喉科看感冒，順紲檢查耳空？後生笑，「順紲？」著啊，出一逝門，一兼二顧。

疫情時代，發燒的人去病院，一定會予人做快篩，想講咱猶是家己先做一下。快篩劑有家己買的，有注疫苗時贈送的；幾若組，攏囥（khǹg，放）咧閒。

結果一下篩，兩條線！

罕得出門、無啥機會和外界接觸的人，哪會著武漢肺炎？完全想袂到。

  好佳哉，後生和我篩出來的，是一條線，陰性。我第一遍使用「傳說中」的快篩劑，採檢枝佇鼻空內底若挖炭礦按呢深入去，也驚也痛，足袂爽快；一時真同情朋友的孫仔，聽講有一陣，伊uì幼稚園轉來，媽媽會共伊篩一遍，篩甲唉唉叫。

既然確診，隨掛號，和醫生視訊問診，然後派囡仔去提藥仔。台灣的醫療體系予人放心，拄（tú，遇見）著這个世界大瘟疫，知影按怎做。

厝內也啟動防疫機制，喙罨掛起來，透明的面罩也掛起來；碗箸、湯匙分開，隔遠遠講話。

面罩真袂慣勢，我甘願掛兩層喙罨。

囡仔隨寄轉來一大袋漢藥材，交代有的燃起來做茶啉，有的會當摻入去雞湯煮。

  可惜，袂赴矣，隔兩工，我也頭昏昏腦鈍鈍，行路浮浮。囡仔叫我閣篩一遍，確認是毋是陽性。我驚痛，講免，「我家己宣布當選。」態勢已經遮爾明矣，無需要等最後彼跤票箱開出來。

  不過，雖然症頭輕，kan-na（只）小可嗽，猶是照起工掛號、食病院的藥仔較妥當。尾後，我姑不將閣揬（tu̍h，戳）一擺鼻空；無意外，兩條線。好咧這遍採檢枝家己慢慢仔撚，無遐爾驚。

紲落和醫生視訊，健保卡和兩條線的試劑先囥佇下頦（下巴）予護理師留一个記錄；這聲，我就變做衛福部統計確診人數內底一个數字矣。

  翁某攏確診，顛倒較簡單，湯匙、碗箸免分開用、分開洗，會當仝桌食飯；講話也免遠遠用喝的。（照規定，確診的愛家己關佇一間獨立的房間，阮無做到遐爾嚴。）

  毋過，喙罨猶是無遛（褪）落來，掛咧較安心。囡仔送糧草來，囥佇門口；有包裹來，手伸長長去接。

  也接著關懷中心的電話，最後彼位先生講：「有必要的時，你會當拍這支電話；電話號碼你欲記落來，備而不用無？」我講好，「備而不用」，我佮意這句。

《文訊》2023三月號