我提一跤紅色的皮包，問小妹欲愛無，有適合送予啥人無？

正皮，真濟年前，阮翁佇日本買的。設計特別，好看；不過，袋仔身深，喙細，撏（jîm，掏）物件無方便，我罕得用。小妹講：「若掠水雞（青蛙）彼款茭荖仔（ka-ló-á，簍）。」我大聲笑出來，隨想著做囡仔的時看過彼種物件，竹蔑仔編的，喙細，腹肚大，和紅色皮包的形體確實有親像；皮包內的物件愛伸手入去摸，水雞予人擲入去茭荖仔，也無法度家己跳出來。

我講伊哪會遐爾gâu（擅）想，比喻甲遮爾適合，閣心適。伊講毋是伊想的，是媽媽講的。「媽媽看你揹（phāinn）這跤（ kha，只）皮包轉去，隨講若掠水雞的。」媽媽的反應一向真緊，也趣味；四五十年前的代誌，這陣講起來，我猶會當「看」著媽媽的表情。

講著正皮，想著一年去北海道旅行，有佇札幌一間百貨公司買過皮包。彼陣，我看佮意兩跤，一跤鹹菜色，一跤咖啡色，欲送阮媽媽和阮大家。付錢的時，我淡薄仔袂放心，想講這毋知是真正皮的抑是化學的？我的日本話kan-na（只）一屑仔單字，就按呢問：「Kore wa honto…… 」意思是「這是毋是真的…..」，「皮」袂曉，我搝（giú，拉）家己手盤的皮，予伊看。彼位中年查某店員起先的表情是疑問，過兩秒鐘，直直頕頭，講：「so so so 。」意思是著著著。

提彼跤鹹菜色皮包予阮大家的時，順紲講我和日本店員的肢體語言，伊笑咍咍，教我「皮」按怎講，我隨聽隨袂記得。轉去員林，提彼跤咖啡色的予媽媽的時，大姊夫也佇邊仔，伊笑上大聲，日後不時共人講我佇日本買兩跤人皮皮包。

2023/1/12《自由時報》副刋