兩棟樓的中間有天井，所以佇浴間有時會聽著隔壁講話的聲。

這日，我共囡仔講：「隔壁翁某毋知咧冤啥，ònn-ònn嚷。」Ònn-ònn是齆鼻聲；後生毋捌聽著這句，問我伊有啥特別的意思無。

我講人氣起來，話講袂好勢，予人聽著，就敢若賰相嚷ìnn-ìnn-ònn-ònn的聲音。

上早，是阮媽媽講附近一个啞口予人欺負，和人冤家，話講袂伸捙，「kan-na（只）會曉ìnn-ìnn-ònn-ònn，真食虧。」

阮後生對家己的母語有咧研究，我是伊「田野調查」的「耆老」；所以一半擺我講出伊無聽過的話，攏會問甲一枝柄（打破沙鍋問到底）。真神奇的是，我無意間會雄雄puh一个幾十年毋捌講過的詞，彼攏是少年的時聽阮媽媽講的。

我問後生有聽過ki-li無？無。啥意思？

    欲按怎解說？我想著一句俗語：神仙拍鼓有時錯，跤步踏差啥人無。

著啦，阮媽媽講的就是「米店的阿發遐爾gâu（擅）算數，kí-lí嘛會算精差」，「閣較小心，kí-lí嘛會拄著意外」。所以，kí-lí應當會當解說做「加減」、「總是」、「一半擺」。

閣有，阮媽媽慣勢講「無物無代」，毋是「無代無誌」。兩个辭有淡薄仔差別，「無物無代」時常有毋甘的意思，可比，「阿祥無物無代予人拍甲規身軀傷。」

講附近跤手無清氣、偷提物件的歹囡仔，阮媽媽講「彼个歹星（tshenn）」；有時閣加講一句「歹té-luh」。歹星是名詞，歹té-luh是形容詞。我請教朋友，伊講in無講這款話。

啊「問甲一枝柄」是按怎來的？阮做囡仔的時按呢講。問台北人，伊講「問甲有一枝柄通攑」。一个問題會予愛問的人問甲生跤生手？生柄？

《福報》2022/12/23