去地政機關辦代誌，入門看著遐大間的辦公室，毋知欲去佗一个櫃檯；近視，當咧繩（tsîn，定睛細看），隨有志工共我揲手（ia̍t-tshiú，招手）。

我去坐伊面頭前，共伊講我欲辦的代誌。伊提一張表出來，佇面頂用鉛筆做記號，隔一時仔，講：「你欲叫排骨抑是三文魚？」

啊？較早公家機關的櫃檯懸懸，市民去辦代誌，敢若入去衙門，著徛（khiā，站）咧看公務員的面色；後來經過某一任市長的大改革以後，櫃檯放低，雙方會當平坐徛，講話真好勢，服務也加真親切。毋過，替我叫便當？是毋是倚晝仔，伊知影我代誌辦好，一定超過食飯的時間，好心替我服務？

坐伊邊仔的查埔志工講：「你欲問我，頭殼嘛小斡 （uat，改變方向）一下；頭犁犁，那做工課那講話，伊叫是你咧和伊講。」

著啊，害我一時掠做這陣的志工，服務好到這款程度。

表單的字細，我若一條一條讀，毋但了時間，也較辛苦。有這位查某志工重點做記號，我瞭（瞄）一下就明白；隨照伊講的，佇空格仔勾一下；勾好，簽名，伊提我的身分證和悠遊卡去印複本，閣替我抽號碼，然後叫我去膨椅遐坐，等叫號。

有志工服務真好！

我第一遍承受著志工的服務，是真濟年前去辦印鑑證明；因為心內猶有到「衙門」辦事的印象，紮一本小說，準備欲來對抗長時間等候的無聊。想袂到入去戶政事務所，就有人行過來，教我抽號碼，請我坐佇膨椅等。輪著我和辦事員面對面坐差不多十分鐘了後，我就提著印鑑證明矣。

志工對老歲仔人尤其周到；牽伊落樓梯，叫伊寬寬仔行。

日後，我去公家機關，心情就較輕鬆。

遮濟年，台灣不管公家抑是私人機關，志工無所不在。像我這款去到生疏的所在就若行迷宮的人，步步有志工通問，真感恩。

人親切，辦代誌的效率也愈來愈好，台灣的進步就是表現佇這款小所在。

《文訊》2022/12月號