透早，門拍開，看著一大包物件。提入去看，有菝仔、水柿、湯匙仔菜，閣有一大碗公的肉丸仔。

較早一个民間故事講：一對兄弟做伙種作，逐遍收成，攏公平分做兩份。毋過，阿兄想講小弟的囡仔較濟，天未光就偷偷仔提一寡去囥（khǹg，放）佇伊的門前；小弟想講阿兄年紀較大，應當分較濟，也會趁無人看著的時，偷偷仔提一寡去囥佇伊的門口。……

不過，阮的情形無仝款。我無像彼位阿兄，kan-na（只）小妹不時會提物件來囥佇阮的門口，順紲共阮的報紙提上四樓。小妹攏講妹婿愛踅（se̍h，逛）菜市仔，買菜買果子；食袂完，央阮鬥食。啊規鼎的三杯雞、肉丸仔按怎講？伊講橫直家己一家伙愛食，加煮一寡無差。哪會無差？愛洗，愛切，愛剁。是伊骨力（勤快），對阿姊好。

我的姊妹仔緣真好，論真想起來，是因為有這个骨力閣熱情的小妹。上好的是，伊蹛（tuà，住）隔壁巷，欲見面、欲提物件予我，足方便；伊佇員林買的透天厝和大姊in兜公家一堵壁，阮大姊當然也足愛伊轉去。

伊閣有一个優點，記持袂bái（差），對家族的過去比我記較濟；有時我文章寫著爸母，伊會當補充我毋知抑是袂記得的代誌。伊講因為我早早來台北食頭路；伊佇媽媽身軀邊較久，結婚了後猶佇員林蹛三四年，和媽媽、和過身的二姊的囝猶有接觸。

今仔日，日頭真好，風也涼涼，我敲電話共小妹講咱來去公園開講。因為疫情，足久無鬥陣去踅街矣；佇附近行行咧、公園長椅仔坐坐咧，消敨（siau-tháu，抒解）心內的鬰氣也好。有的代誌kan-na（只）姊妹仔間會當講，會當理解。

這个下晡，阮講注肺炎加強劑了後的反應；講親情朋友內底啥人啥人確診矣。講二姊的新婦真無簡單，共兩个囝晟養大漢，毋但緣投，閣優秀。小妹講in孫無要緊讀冊，興（熱衷）社團的活動；閣年外就愛考大學矣。當然也講家己和翁婿的健康問題。小妹講伊昨昏和妹婿去病院回診，坐某一路公車，比捷運較好勢，閣緊（快），30分鐘就到。「而且直接到病院的後門！」我笑伊去看醫生竟然講甲遐爾（hiah-nī，那麼）歡喜。「著啊，半個月一遍出門蹓蹓（lau- lau）咧，親像去遠足！」

草埔仔頂一隻山暗光（黑冠麻鷺）恬恬徛真久，若一節袂振動的柴頭。想袂到這竟然是小妹第一遍看著這種呆呆的鳥。我講你毋通看伊戇頭戇面，伊有法度uì塗底搝（giú，拉）真大隻的杜蚓仔出來。……

講兩點鐘的閒話，吹風，看樹仔，看山暗光，心情確實有較好。