食著朋友煮的便菜：豆包炒柑仔蜜、蔥頭炒雞肉絲、敏豆炒紅菜頭。明明是真普遍的菜，我嘛會煮，哪會伊煮的加遐爾（hiah-nī，那麼）好食！

經過我的研究，是因為伊用真濟蒜頭；而且拍過閣切幼幼，所以炒起來有蒜頭的芳甜味，無蒜頭的薟（辣）。

也有可能伊天生有彼款手路，煮菜本來就和才情有關係。

講起來，我並無討厭煮食，只是數十年攏是煮一般的，無要求家己去試各種新菜式。囡仔、翁婿也捀場，無棄嫌；毋知是in好喙斗，抑是予我「飼」慣勢矣。

不過，這兩三年，我的煮食其實嘛有淡薄仔進化。

有的人，佇外口食著啥好料，抑是看網路節目，會綴（tuè，跟）咧做。我無遐爾認真；毋過，看過百齣以上的連續劇，其中總是有關係煮食的，我加減也有受著影響。早先看的是日本的《天皇的御廚》、《Grand Maison東京》，後來看的韓劇，也有幾若齣主角演總舖師的；《愛情的溫度》、《料理絕配》、《怪咖文主廚》等等。韓國演員，gâu（擅）煮食的袂少，Eric 和Rain是總舖師的水準，柳演錫、朴敘俊也是熟手。綜藝節目內，濟濟明星切菜、炒菜，也有二步七仔；看會出毋是臨時學的。

所以，我佇廚房料理的時，有時會去想著看過的劇情，想著演員切菜、煮菜的手勢，薑絲就切較幼，動作較專業，心情也較浪漫。甚至用指頭仔提鹽起來𫝺（hiù，灑）的時，學《太陽的後裔》內宋仲基和晉久兩人為女朋友煮人參雞的時、假鬼假怪uì（從）空中懸懸𫝺鹽的動作。

想著遮（tsia，這）的，煮菜的心理就有微妙的變化，菜也較好食。這毋是烏白講，味覺敏感的人去熟似的餐廳食飯，會當分辨這日主廚的心情好抑bái（差）。

有朋友講韓劇予伊詩心大發，三不五時就寫一首詩；有朋友講，韓劇影響伊上明顯的是，對年紀比家己較大的抑是前輩，較有禮貌，共人行禮真自然。

看影劇，對我的影響一定也袂少；煮菜，只是其中小小的部份。

可惜，我驚薟，無食薟椒仔（辣椒）；若無，我可能一半擺會煮紅記記、媠噹噹的韓國菜。

《文訊》2022/12月號