講著「關自在」，我衫橱門頂本來就有一幅；彼是2021年新冠肺炎第三級警戒，逐家覕（ bih，藏）佇厝內避疫時，央小丸仔寫予我的小篆。

彼當時，我問已經過了米壽的 Vivian 姊種過肺炎的疫苗無？

伊講無。「一人一室一廁，親情朋友送菜來，去大廳接；家己定時做運動，攑重輪（啞鈴），幌跤腿；無行出大門，佇厝內抗疫。」

伊照常讀小說，寫文章，畫圖，和朋友佇line開講。

我足欣賞伊的生活態度；這个時陣，毋但愛「觀自在」，猶著學會曉「關自在」，才袂感覺無聊、鬰卒。

小篆的「關」字真有意思，親像兩个查某人徛佇門後咧破豆（閒聊）。講啥？「毋知愛偌久，才會當恢復正常的生活？囡仔停課，厝瓦強欲予in掀起來。」「阮囝這禮拜輪著佇厝內上班，逐日著共伊攢（tshuân，張羅）三頓，也真辛苦；本來，老翁某兩人食較凊彩。」「我看著一張相片，猴囡仔無法無天，竟然peh（爬）上神明桌，連公媽都擋袂牢啊！」「莫講囡仔，袂當出去踅（se̍h，逛）街，和朋友見面，我嘛會鬰卒。」也有可能講伊變做網路買物件的高手，抑是講家己煮食技術大進步，連雞卵糕、四秀，都有法度做予狡怪的囡仔食。

經過一年，多數的人有種珠（打疫苗），關佇厝內的時間較短，心情也無遐爾緊張驚惶；有一工起床，目睭展金，我竟然共「關自在」看做「閒自在」。

講起來，咱台灣算是福氣，雖然疫情期間，生活有較不便，經濟也有較稀微；但是，和世界真濟國家比起來，抗疫的成果猶是佇頭幾名。疫情嚴重的時，自中國的武漢到歐洲幾若个城市，著起造「方艙病院」，大規模收治患者，燒屍體的煙也予「天烏一爿」；有的都市實施「封城」，市民毋但無辦法自由買生活用品，親人也無法度見面。意大利有一塊影片，講為著鼓舞民心，軍機佇空中畫意大利國旗的三色煙火，背景配歌劇《杜蘭朵公主》的歌曲〈公主徹夜未眠〉，歌詞是：「我會戰勝一切」；市民佇家己的陽台和厝邊隔壁同齊唱歌、拍噗仔，互相加油鼓勵。……

今年，中國猶有封城的政策，五月，鄭州的民眾聽著封城令，隨趕緊去大採購，有人竟然共半隻豬、甚至規隻扛轉去！毋知in兜有偌濟人，冰箱偌大台？

天公保庇，咱的災情無害甲著設「方艙病院」，現有的醫療資源有夠應付；也無一个城需要封起來，買生活用品無問題；三頓叫外送，買菜叫『宅配』也會使；若照規定，好好仔掛喙罨，也會當出門。

可能是按呢，我才會共「關自在」看做「閒自在」。

《文訊雜誌》2022九月號