因為疫情，隔足久，這日逐家才佇公園見面。

應當是附近的人好心，佇低牆仔頂頭囥（khǹg，放）四堆白飯，有幾隻膨鼠當咧食。

開四桌，真體貼，予in樂暢食，免相搶。有的膨鼠無客氣，家己佔一桌，大喙大喙推（thui，狼吞虎嚥）；有的較斯文，雙手捧起來慢慢仔食。阮呵咾伊有氣質。

閣來，換粟鳥仔招規陣來食桌。粟鳥仔那食那踅踅念，無管人佇邊仔批評指教。食夠氣，飛去一枝彎彎的藤仔頂頭幌韆鞦，兼唱歌。

紲落去，兩隻鵁鴒 （八哥），一隻客鳥（喜鵲）也來矣。這个公園細細仔，毋過生態豐富，普通時就不時會當看著各種的鳥仔，tsit-má（現在）有人辦桌，當然愛來捀場。

這時陣，西北雨綴（tuè，跟）雷公爍爁 （閃電）雄雄拚落來，彼四桌予雨水淋甲變做「流水席」；然後，有鳥仔趁雨閬縫（làng-phāng，間歇）的時，來加減食，阮講in來食菜尾矣。阮是彼種人，「看人食米粉，佇邊仔喝燒。」

不過，阮也有感覺按呢大出手辦桌，無合生態原則；便當食賰（剩）的飯粒去飼公園內的動物猶無要緊，像按呢大規模、一桌一碗尖尖的白飯，有較超過；一方面破壞環境，一方面凡勢予in日後有期待，就袂家己拍拚去揣（tshuē，找）食，動物和人仝款，應當家己討趁啊。

無法度照原來的計畫去散步行路，阮佇雨棚跤講笑話、欣賞大雨也是難得的經驗。

我這个下晡也有實質的收成，「植物百科」小丸仔愛種花草，in彼棟大樓的公共空間予伊種甲十花五色，閣不時會共湠（thuànn，蔓延）傷濟的植物分盆送人，阮兜（tau，家）就有伊送的孔雀薑、長壽花和藍星花；今仔日伊予我一欉種佇葡萄酒杯的小虎蘭，邊仔插一粒松luî（松果），適合囥佇電腦邊欣賞。阿貴予我一張水墨水仙花，32開水彩紙的小品，一筆一筆攏會當看出伊的功力，我順伊的筆法欣賞，心內也綴（tuè，跟）伊一筆一筆畫。阿圓予我一張伊寫的「觀自在。關自在」，萱紙搙（jio̍k，搓揉）皺皺才寫，有特殊的效果；我上欣賞的是伊的徛名（落款），講「習字養心，烹食養身」。伊毋但寫字認真，也足gâu（擅）煮食；疫情期間，這八字有一種無奈中的大範氣質。

圖和字是臨時求來的，in本底是提來聽逐家的意見；我的「意見」上白，「畫/寫甲遮爾讚，予我，予我！」