Y佇Line提醒我，「毋通閣袂記得明仔載的文藝雅集。」

我回：「真慘，一遍袂記得，就予人點痣做記號。」

彼年，有朋友欲畫猴，招我鬥陣去動物園看猴；看動物我有趣味，隨答應。阮一路欣賞無仝類的猴山仔，一路翕相。紅猴、烏冠膨鼠猴和狐猴，攏真心適。狐猴的長尾一節烏一節白，親像貴夫人的圍巾。

阮看in（牠們）佇樹仔頂表演特技，看in掠虱母，也聽in吱吱叫，毋知是咧講話抑是冤家。既然來到動物園矣，阮也去看犀牛、麒麟鹿、虎、豹，感覺這日過了足豐富。

啥人知影轉來厝，開電腦，卻讀著幾若个信息，問我哪無去參加「文藝雅集」？有啥代誌？毋是約好欲坐仝桌？講一个圓桌欠我一个人，缺一角；講照往例，集會結束了後，幾个人去啉咖啡繼續講天說地。

唉呀，我哪會共這件每年一擺的代誌袂記得甲遐爾澈底？是好朋友辦的重要活動呢，進前工作人員也來問過我欲和啥人坐仝桌，閣共我的桌號寄予我，我竟然缺席！

聽講我是去動物園，in講：「啊你是啥意思？敢講阮比猴山較無好看！」

自彼遍以後的文藝雅集，我若較慢到，就有人講我無定著閣袂記得矣。

今仔日，閣予Y按呢講，我怨嘆一遍失誤，就予伊記牢牢。伊講：「總是袂當kan-na（只）我予你講。」群組內的阿芳佇邊仔喝燒：「教堂vs.動物園，兩人有拚，哈哈！」

Y教堂的故事閣較譀（hàm，誇張）。

阮的好朋友阿嘉過身，佇「懷恩堂」的追思禮拜，Y叫我替伊留位，兩人坐做伙，傷心較有伴。結果，我直直越頭「貓貓相」，攏無看著伊；到最後的「花語」，逐家排列提一蕊花向阿嘉做最後的辭別的時，才看著。

Y講伊差不多時間到禮拜堂；毋過，行毋著所在，去平平佇新生南路的「聖家堂」。佇遐，聽聖歌，聽台頂的人致詞；講的名毋是阿嘉，想講彼可能是伊的教名。後來愈聽愈奇怪，而且，毋但無看著我，也無看著新聞界和藝文界的朋友。