五日節一个風俗，是佇門前吊一把驅邪避凶的植物，榕仔枝、艾草和茅仔草等。今年上需要避的是肺炎病毒。

我照往年的例，去樓頂剪一寡看起來會當避邪閣有芳味的草。今仔日鉸的是檸檬香茅、香椿、茉莉花和樟仔枝。

也加縛兩束，予蹛（tuà，住）隔壁巷的小妹和伊的後生。

舊年予伊的，伊無擲掉，變成焦燥花，竟然真媠。

這个早起，阮兩姊妹仔喙罨掛咧佇巷仔頭交接五日節避邪的草的場面，予我想起1996年佇意大利中部小山城阿西西，看著兩个查某人佇巷仔開講的畫面；較遠的所在，是對聖方濟教堂行出來的四五位穿烏長衫的教士。

彼是罩雺霧的透早，氣氛茫茫緲緲，不止仔虛幻。

關佇厝內避疫，旅行中的記持敢若特別清楚。

這是我佇面冊頂頭寫的一篇短文；原文是華文。

阿屏幾工前才去讀著，講伊足欣羨我的好記性，竟然旅行時一个小小的風景都記甲遐爾（hiah-nī，那麼）清楚。「人講人老的時記遠無記近，我近的、遠的攏袂記得矣！」

我共伊講，伊無看著我寫這兩三百字的過程。

一開始，我清清楚楚想起彼个畫面；毋過，是佇佗位？佗一个城？佇西西里島抑是像靴管的意大利本土？彼遍的旅行叫做『義大利、西西里精緻旅遊』。到西西里的時，領隊提醒阮，佇遮（在這兒）毋通講一个詞：Mafia；敢若隨時會去拄（tú，遇見）著烏手黨。

阮可能無拄著烏手黨（拄著嘛毋知，烏手黨敢攏像電影「教父」內底的人？），我kan-na（只）會記得佇西西里島看過真濟大石頭的古蹟，和一齣佇廣場演的希臘悲劇。「兩个查某人佇巷仔開講」的幼秀畫面，應當毋是佇遐；意大利本土踏跤到的所在自大都市到小城幾若位，嘛無法度想起彼个予我記甲遮爾清楚的風景是佗位。去查當初我寫的手摺簿仔，並無提起這；旅行的時攏是寫簡單的關鍵字爾。但是，看著阿西西這个地名，我的目睭光起來；上網路去查，足有名的聖方濟教堂佇遮！著，就是遮。

我共阿屏講，為著欲寫彼三百字，彼逝旅行的筆記，我對頭掀到尾；彼逝旅行的風景和團員之間發生的笑詼，我佇頭殼內搬演；閣揣網路。……

 我講：「我的記持是按呢呼請來的。」（親像咧呼請神明）。

2021.11.28《聯副》