2021-11-04 07:49:15Liu 靜娟

《台語時間》年紀就是履歷?

 

銀行小姐問我哪會欲辦網路銀行?我講按呢,以後欲匯款抑是欲知影存款數目,攏免來銀行;為著疫情,來一遍銀行攏著考慮規半晡呢。我無講的是:佇連續劇,不時聽著「號碼予我,我共你匯錢過去」的話,聽起來真媠氣;頂日,後生也講,「媽媽竟然無用網路銀行!」感覺家己真落伍。

辦好,銀行小姐問我:「你知影按怎用無?」

我應,「應當無啥困難啊。」

伊的意思是:你敢會曉用網路?

 

中醫師講我神經痛的問題是佇跤腿,教我剾痧 khau-sua,刮痧);講用瓷仔湯匙就會使,愛摳甲烏青凝血才有效。我袂曉,也驚痛。伊講:「你也會當去買一枝掠龍銃 (按摩槍),家己掠筋脈。」

可能我的表情是「掠龍銃是啥碗糕」,醫生問我:「囡仔有和你蹛(tuà,住)做伙無?」

「無。」

「無你和啥人蹛?」

「阮翁。」

伊的表情是:恁翁嘛是老歲仔,仝款無效。
毋是第一遍予人問有和囡仔蹛做伙無,這陣,我竟然過一時仔,才想著伊按呢問的原因。

我隨講:「我會當家己上網路去揣(tshuē,找)掠龍銃。」

「喔,你會曉用網路,按呢上好。你也會當佇網路買,毋免買傷(siunn,太)貴的。」

真冤枉,資料頂頭,我的年紀寫甲明明白白,予人的第一印象是:這个年歲的人和科技產品無關係。

差不多五六年前,一个比我較少年的作家問我:「你文章寫好,是毋是愛拜託人替你拍字,替你傳出去?」

我講我早就用電腦拍文章、用電子批傳矣。予人看做袂曉用電腦的古早人,有一點仔不服,我講:「二十年前,我就有開blog,歡迎你去看。」

伊去看了後,共我講欽佩;連貼佇遐(hia,那兒)的圖也呵咾,講:「款款咧,會當開畫展矣。」

我的圖是「三跤貓」,只是畫圖課的作業;毋過,用電腦的資歷已經真久,當初佇報社,就算是「先鋒」矣。

雖然講用二、三十年,我到今用的猶是電腦/網路基本的功能;一寡奇巧的,驚個資漏洩,日常也無使用的必要,我就無去設定,也無去學;所以,拄(tú,遇見)著較傷腦筋的,猶是著靠囡仔。

我共朋友講,一遍一遍予少年人按呢問,毋知是藐視抑是體貼?伊講:「咱愛認份,愈老愈鈍、綴袂著(跟不上)時代是必然的;毋過,老就予少年的看無,這是年齡歧視。」

伊講退休了後,佇生份人面頭前,必要的時會自動提起家己以前的職業。「按呢,有身份,人才袂kan-na(只)用你的年紀來判斷你的經歷和能力。」

2021.11月號《文訊雜誌》