大箍查某消遣家己，講肥的好處和肥的不得已；最後，伊講：「上帝啊，你若無法度予我變瘦，請共我的朋友攏變肥。」

Y共傳這个短片的L講：「拜託上帝共你的朋友我變肥！」

我感覺意外，想袂到伊會想欲變肥。三四十年來，伊保持穿啥款衫攏時行、好看的身材，敢有必要生較濟肉？伊講老矣淡薄仔肥較好，免驚「肌少症」，較有病本，面皮也較無皺痕。

按呢講是有道理，毋過伊瘦著有型，跤手也扭掠（liú-lia̍h，俐落），應當猶免煩惱肌少症。

一遍伊看著公車佇欲到站，咻一聲走（跑）去，我遠遠看伊走，笑甲歪腰；因為伊予我想著一个同學畫的Q版五彩杜定（tōo-tīng，蜥蜴）。彼日伊穿狹管的花仔長褲；走著閣若飛的，速度無輸杜定。

講著變大箍的願望，可能無人和我20歲的時會比得。

怪阮媽媽不時共我洗腦，攏講我傷（siunn，過於）瘦，也會用中藥材煮好料的共我補。可惜我少年的時鐵骨仔生，補袂肥；有時閣食肥走瘦，袂堪得。

彼陣，我有一个和我仝款計較家己身軀斤兩的好朋友，兩人三不五時會去衛生所磅重，若加0.2公斤就足歡喜，減0.2公斤就憂頭結面。

後來，我來台北食頭路，逐回轉去員林，阮媽媽就斟酌相，看我有較肥無；甚至嫌我哪會攏無加生肉，講某乜人的查仔囝去台北共人煮飯，「肉材」變甲真好，皮膚白，面皮膨。

我講我毋是去共人煮飯，無法度變肥啦。

我也開始有自覺，感覺家己實際上並無偌瘦，肥瘦純然是觀念的問題；一个160外公分的明星才45公斤，也咧減肥。當時我差不多是彼款身材，猶加伊一公斤呢。

毋過，老母予我的影響猶存在，看著新產品「美力肥」的廣告，毋知彼有啥副作用無，竟然去買來食；也確實有肥一兩公斤，面較膨。朋友「詼」（虧）我是食「歐羅肥」。彼是彼个年代豬飼料的添加物；本來是予豬仔較好飼，後來煞予人共看做「豬飼料」。

後來，結婚生囝，一年過一年，就免食美力肥矣。

Y聽我講起這段歷史，講這陣毋知猶有美力肥無？我講欲肥有啥困難，你無看偌濟演員為著欲適合影劇內底的角色，拍拚食，一聲就增加幾若公斤。

我講：「你gâu（擅）煮食，拍拚煮，拍拚食，保證真緊就一身軀全全三層肉。」

伊講伊無演員彼種為演戲生肉的動力，無可能有執行的決心。

「按呢，你就莫講想欲肥，才袂氣死拍拚欲瘦的人。」

  2021.11月號《文訊雜誌》