和朋友約見面的餐廳離教堂近近仔，所以我較早出門，有時間入禮拜堂共一位作家致意。聽講伊交陪的文藝界朋友無濟，伊的姊妹仔也毋知伊的人際關係，驚來參加追思禮拜的人可能真少。

我毋捌（不識）伊；毋過，讀過伊的文章，寫了真好；我編《新生報副刋》的時，也有刊過伊的作品。

我入去的時，發覺禮拜堂的椅仔坐差不多滿矣。

我坐好，拄好 （tú-hó，恰巧）咧播送詩歌。宗教音樂佇這个足懸、半圓形的穹頂下面，來回踅 ，聽起來特別幽微，也悲傷；我目箍燒起來。尤其想著伊才五十外歲，人生的路照講猶真長才對。

歌唱過，伊的外甥佇台頂追思，講伊的阿姨愛旅行，幾若遍和外甥、老母鬥陣出國，去過三、四十个國家；阿姨目睭足差，但是為著欲完成一位作家的傳記，讀足濟冊、揣（tshuē，找）足濟資料，根本無管家己強欲青盲矣；伊也做過心理諮商的工課，指導真濟人養生、心靈醫療、揣著正確的人生目標。……「但是，也因為伊較相信遮的（這些），到落尾去求醫的時，已經是癌症末期！阮攏足著驚，竟然毋知影阿姨病甲遐爾嚴重。」

紲落去，伊的阿兄也講小妹的個性和日常生活。……

這是我第一遍參加無熟似的人的禮拜，予我有一个感慨：人的一生最後濃縮佇親情朋友的致詞內底。

少年的時，讀過一課英文，講一个人興去參加告別式；無熟似的也去。我講彼是啥怪奇興趣，無正常！英國老師講無奇怪啊，人百百種，人生無常；去彼个所在，有的人借機會消敨（siau-tháu，抒發）家己的鬰卒、悲哀；也會當思考人生的意義。

有影，我想著一遍，一位大姊佇告別式吼（哭）甲honn-honn叫，叫是伊和過身的人有特別的感情，人共我講伊最近拄著足悲哀的代誌，順機會敨氣。

彼日的追思會，確實也予我想一寡以前無去想的代誌。

2021.12.17《人間福報》