整理屜仔，提出幾盒名片；面頂有註明是「文藝界」、「親友」、「其他」，甚至有「餐廳」。餐廳是為著罕罕一半擺請朋友食飯的時，做參考。

以前，逐家見面，時常會交換名片；這陣，真濟人交換line，也可能佇手機仔頂頭輸入對方的電話；其他資料，愛記，就家己去添。

講起來真方便、真科學，毋過，較無文字的趣味，也較無人味。

今仔日，名片一張一張檢查，大部份的攏無必要繼續留；欲聯絡遮的（這些）朋友，用面冊、line抑是電子批就好。有的名片，是參加會議，抑是旅行的時熟似的人，分開了後就毋捌見面；有的名片，予你想起彼逝（tsuā，趟）旅行食著啥特別的料理；有的名片，想真久猶想袂起來是啥人，無可能去相揣（tshuē，找）；較悲哀的是，有的人已經提早離開這个世界－－所以名片毋甘擲掉，留起來，後遍看著會當閣共伊好好仔想一下。

有的名片有特別的設計，抑是有媠媠的圖，嘛毋甘擲掉。

我家己的名片猶三四盒，這一方面愛怪我無愛送名片，一方面愛怪我開印刷社的朋友愛替我印名片。伊講印這真簡單，也無偌濟錢；所以我的名片有淺淺的黃的、青的、粉紅的；直的，坦橫的；攏樸實大方。退休前無愛用，退休後，無必要用，做紀念爾爾。

這陣整理，想講凡勢會當共in提來做便條紙；雖然無黏膠，好好仔寫字，用吸石貼佇冰箱頂頭，仝款規格，排起來一定真有氣質。想罔想，tsit-má（現在），寫的總是「牛奶、雞卵、橄欖油、綠豆、衛生紙」遮的欲買的物件，凊彩（隨便）紙條仔都會當應付矣；而且，啥人會好好仔寫這種生活日常的物件？看有就好矣。

2021年9月號《文訊雜誌》