天氣熱，佇厝內穿的短褲（運動褲）無夠替換，是毋是來去買兩領？毋通，疫情三級警戒的時陣，袂使為著這款對生死無影響的代誌出門。

隨想著衫櫥大屜內底有幾領後生熱天的長褲，猶真新；逐遍整理，加減會送出一兩領，這是留落來「做見本的」。一年一年，褲的長短、闊狹加減有改變，準做日後流行倒轉來，囡仔的身材也無仝款，無啥可能閣再穿。

所以，揀一領看起來較涼的，用大鉸刀殘殘（果斷）共兩个褲跤鉸掉，予伊變做短褲。

本來想講褲跤無紩（thīnn，縫）嘛無要緊，這幾年，少年的時行穿破幾若空的牛仔褲，褲跤布邊也隨在伊鬚鬚，若番麥繐（sui）。毋過，老人做彼款打扮，可能毋是時行，是荏懶（lám-nuā，邋遢），褲跤猶是縫起來較好。

罕得做針黹的工課，跤手較hân-bān（笨拙），毋過，做囡仔的時陣，不時看阮媽媽做衫，真濟動作攏囥（khǹg，放）佇頭殼內。阮媽媽足頂真，拗布邊會用糊仔「田嬰點水」按呢小可黏過，閣熨過，才用裁縫車去車抑是手縫；所以攏足平。糊仔是用太白粉khi̍t；太白粉先用冷水抐（lā，攪拌）予散，才用滾水去沖，就變做透明的糊仔。有時，阮媽媽會摻糖去攪，予阮做四秀（零食）。我五十歲彼年去日本奈良旅行，佇法隆寺邊仔一間小店食「善哉（紅豆）湯」，我講窗格仔頂寫的「葛湯」毛筆字真媠，朋友就叫一碗予我食看覓。一下食，根本就是我做囡仔時食的「太白粉糊」嘛。毋過，葛湯有足淺的綠色，雖然也是透明的。

我紩褲跤無用糊仔，量其約仔拗，量其約仔熨一下，就開始用手縫。紩甲大細針，也無要緊；阮媽媽若猶佇咧，一定看袂做得，會叫我拆掉重新縫，抑是規氣替我縫。啊我這个潦草查某囝一定會應：「無差啦，橫直佇厝內穿，好穿就好。」