我的反應一向有較鈍，一个自二十外歲就交陪的朋友，就不時講我「欠一條筋」。

偏偏有時我的反應足緊（快），過後就有一點仔後悔。

可比今仔日，我接著一个電話，聽著「車貸」兩字，我應，「這我毋免」，電話隨掛掉。

後來家己反省：敢著遮爾（tsiah-nī，這麼）無情？予人加講幾句，才笑笑仔拒絕，敢毋是較袂傷人的感情？而且，少年人四界拍電話招生理、做這款予大部份的人討厭的代誌，嘛是為著生活啊。

可能也袂當怪我，我罕得用手機，對我來講，手機主要的用途是Line和翕（hip，照）相；一半擺敲電話也是透過Line 。所以來源不明的電話在我心內毋是「來者不善」，就是生份人；接起來的時敢若予電電著，淡薄仔緊張。

有時和人面對面的反應，嘛有較緊、較無禮。

去花蓮旅行，蹛（tuà，住）一間溫泉民宿。號做民宿，在阮眼內，其實是一間有規模的旅社，不管雙層建築外面的色水抑是室內的裝潢和用品攏真有氣質，聽講頭家的本業是做設計；服務人員雖然無幾个，但是服務周至，頭家娘尤其親切。

第二工早起，阮食過簡單的早頓了後，佇中庭行行看看，翕兩張仔相，頭家娘笑笑仔問：「需要我共恁翕合照無？」我講多謝，毋免。

過一時仔，我想講我是毋是有較「冷」？敢有需要按呢違背人的好意？

我問後生我的口氣會較過份無？伊講：「我本來想欲應好啊。」

好咧猶有機會補救，阮行李款好、欲離開前，我自動拜託頭家娘共阮翕相，伊足歡喜，連紲講：「多謝，多謝。」

我講：「哪會顛倒你共我說多謝？」

伊講：「足榮幸啊。」

為著欲予阮的相片有較媠的背景，伊隨去開水道（水龍頭），予一面壁出現「水幕」。

伊遮爾歡喜，遮爾熱情，無疑悟煞變做我做一層好事。

2021.7月號《文訊雜誌》