阿美豉（sīnn，醃）瓜仔哖（小黃瓜）來分予阮，八个人一人一包。伊講：「若好食，共我講，我閣豉予恁。」有人先開伊彼包予逐家試食；好食，開脾，配飯配糜攏袂bái（差）。  

骨力的阿美講做這真簡單，免啥時間。毋過，我這種無氣力、驚麻煩的人，將心比心，想著伊買十五斤的瓜仔哖，洗，切，用鹽豉過，才用適當份量的料去豉，貯（té，盛裝）入去玻璃罐仔，佇冰箱浸四工，紲落來一包一包分好、重khok-khok捾（kuānn，拎）來予逐家，就感覺是大工程。

所以，我毋敢共伊講真好食；驚伊閣豉予我。

收著禮物，禮貌上愛呵咾，講甲較膨風也無要緊；毋過有時有一種後果，予人呵咾的人可能會閣提仝款物件來相送；準做彼確實是你佮意的，嘛是會歹勢。萬一毋是你真正佮意的，閣較為難。

講著「我毋敢講」，煞（suah，竟然）去想著一个故事。

阮小妹少年的時誠無聊，不時去問伊的後生，爸爸較媠抑是媽媽較媠？逐遍攏會得著伊欲聽的答覆。啥人知影，一遍伊閣按呢考後生的時，彼个三四歲的查埔囡仔竟然講：「我毋敢講。」「哪會毋敢講？」

伊退兩步，講：「你會共我拍。」

我笑小妹一定是予小小的囡仔感覺媽媽是輸袂起、「輸就起痚呴（he-ku，哮喘）」彼款人，伊才會按呢講。

2021.7月號《文訊雜誌》