「韓國是整容大國」是台灣人普遍的常識，有一遍我跋（pua̍h，跌）甲鼻骨險險仔斷去，阮小弟也共我講，「斷去嘛免驚，去韓國一逝（tsuā，趟），就會當共你的鼻修理甲比本來的閣較尖、較媠。」

講著整容，阮三姨上有經驗。

三姨生做媠媠仔，有一點仔親像瑪麗蓮夢露。阮媽媽講伊自少年就足愛媠，比別人較出色，佇鳳梨公司食頭路無幾工，阮姨丈就予伊「煞（sannh，迷）」著。

姨丈白手成家，gâu（擅）趁錢，也疼某；活潑的三姨「變鬼變怪」，伊攏笑笑仔看。欲創啥，也袂反對。

幾若擺，三姨來阮兜（tau，家），會問阮：「你看我有無仝款無？」

「面肉真幼，無皺痕。」知影伊的心理，阮攏講伊佮意聽的。

伊笑甲目睭微微（彎彎），講，「最近去注射，做小針美容啦。」

隔幾若年無見著，彼遍見著面，伊隨問我，「你看我有無仝款無？」

我斟酌看，講，「哇！閣較少年，愈來愈媠喔。」

見面前，我就聽媽媽講起伊去做過大工程。保守的媽媽交代我毋通當三姨面頭前提起整容、手術遮的詞。

其實，三姨是「事無不可對人言」的個性，免問，伊家己就講兩個外月前，去「搝（giú，拉）皮」矣。彼當時，伊已經六十歲。

這遍做手術，伊用足大的勇氣和決心；恐驚有意外（麻醉了後無醒起來？），來台北進前，共金仔、璇石和手摺簿仔交代查某囝，才家己去成都路一間整容病院。

手術第二工，伊照鏡，驚一大趒，「我哭出來，想講我哪會行到這途？戴這个驚死人的小鬼仔殼，欲按怎見人？」

「行到這途」，袂輸去做鱸鰻（流氓），我出聲笑出來。

好佳哉，經過一段時間，面皮袂譀譀（浮腫），面色也恢復，確實有變較少年；伊滿意，才愛自動講伊的手術驚險。不過，按怎搝皮，我隨聽隨袂記得。

家己愛修理外表，叫是（以為）別人也有這款心理/做法，一回看著我，竟然問我，「你去做過乎（honnh）？」

我講我驚死，也無伊遐爾愛媠。

「若無，你趁錢欲創啥！」

2021.6.13《聯合報》副刋

 （圖是金泰希和丈夫Rain拍的寢具廣告。她是麗質天生，沒有加工；在韓劇裡說到美女，金泰希常被提及，包括做為整容範本。）