話講一半，小妹忽然間細聲問我，「彼＊＊＊有張（tng，捕）著無？」

我一時聽袂出伊是咧講啥，伊閣講一遍，才聽著伊是講nezumi，日語的鳥鼠。

Nezumi是我和小妹熟似有限的日語之一，因為彼是阮媽媽講的話。做囡仔的時，阮厝是日式木造建築，加減有鳥鼠出現；逐遍媽媽講起，就用日語。伊講：「nezumi足精，若予in聽著，攏張袂著。無管是用籠仔張，抑是用鳥鼠仔藥毒（thāu）。」

我心內想，既然in遐爾（hiah-nī，那麼）巧，無定著早就學會曉外語矣。毋過，這个機密已經是阮兜（tau，家）的傳統，幾十年來，欲對付這種奸巧的生物的時，阮攏毋敢光明正大講出「鳥鼠」兩字。我的外甥較新派，伊的「密語」是Mickey。

佇台北幾十年來，鳥鼠佇阮兜出現可能無超過三擺；毋過，個外月前買的矮牽牛花栽明明有花莓（花蕾），卻未開花就無去。起頭懷疑是鳥仔抑是露螺來食，後來一盆紅龍草的插枝兩排攏倒落來，我才判斷是鳥鼠。

以前佇頭前的陽台種兩三个長盆的矮牽牛花，總是開甲鬧熱滾滾，佇樓跤攑頭看，感覺in對巷仔的美化真有貢獻；這陣，竟然有鳥鼠來破壞，無對付伊敢會使得？

我用籠仔張，內底勾一塊芳芳的肉。

經過兩工，攏無看著鳥鼠；第三工，斟酌看，內底竟然根本無肉。可能早就予伊食去矣。

我敢拄（tú，遇見）著有輕功的鳥鼠？決心和伊「鬥智」，我閣再佇籠仔內勾一塊肉；經過一日、兩日，猶原封不動。所以，我得著上滿意的結論：鳥鼠已經旋（逃走）矣。

講實在的，我嘛驚去張著伊。kan-na（只）想著和伊四目相對，就起雞母皮，免講猶著共處理。殺生是無可能，若無，敢著愛像我的厝邊按呢，暗時趁無人看著，偷偷仔提去公園放生？

萬一，伊親像予人放捒（pàng-sak，遺棄）的貓仔狗仔按呢，家己閣轉來主人兜？

2021.5.7《人間福報》