新曆一月，台南山區的虎頭埤已經是春天，幾若種花開甲足鬧熱，大葉欖仁的葉仔佇台北二月底、三月初才會轉紅轉金，落落塗跤；佇遮（這兒），已經落真濟，樹枝頂頭也偷偷仔咧發新穎（芽）矣。

風景媠，順環湖步道行，微微仔風吹著也予人真爽快。

然後，看著可能是翁某的兩个老人靠佇欄杆斟酌咧相湖水，毋知水內有啥奇巧的物件，阮也倚（uá，靠）去看。

是一隻水鳥頭伸出水面咧泅（游泳），鳥頭的色水真媠，咖啡色帶紅和綠，泅水的姿勢也真優雅，真定著（穩重）；看一時仔，就感覺心情足好。

「毋知是啥物鳥，遮爾仔（tsiah-nī，這麼）媠。」彼个某對我講。

「著啊，毋捌（不曾）看過。」我應伊。

「鳥仔萬百種，連動物頻道都看袂了。」伊講。

當咧欣賞，一个少年的也倚來，伊看一觸久仔，笑起來，講：「樹葉仔啦，風共伊捒（sak，推），恁當做伊咧泅。」

敢有可能？四雙目睭看足認真啊。我無愛相信，才想著用手機仔翕（hip，照）起來，閣用指頭仔掰一下，共伊放大；正經是樹葉仔！

唉，四雙老歲仔目，敢會看贏少年的一雙目睭。

好咧有手機仔通靠，老歲仔免和少年的烏白諍（爭辯）。

有一陣，我學畫圖，老師教阮「微觀」，觀察各種物件的細節；講無管植物、動物抑是日常用品，放大了後選局部來畫，閣加入家己的創意，會有特別的效果。彼時陣，手機就真有路用。

有一年，我去看阿萱跳「佛朗明哥」，台頂逐家攏穿十花五色的跳舞衫，化厚妝，我閣近視，繩（tsîn，定睛細看）足久，猶看袂出我的朋友是佗一位。阮小妹教我：「你目睭瞪較大蕊就看有啊。」唉，目睭好的才會講這款無智識的話。

彼陣我若有智慧型手機，就免看甲目睭挩窗。

頂日，我和阿末運動煞，行去公園梅仔樹彼區看。梅仔樹有十外欉，當咧開花的時，一陣一陣人來翕相，足鬧熱；這陣梅仔已經結甲密密是，會當豉梅仔汁抑是梅仔酒矣。阿末講：「有一年，梅仔一暝就予人挽了了；公園的，我毋敢挽，tsit-má（現在），梅仔嘛猶傷細粒。」我講：「翕起來，轉去厝放大才挽。」

2021.5月號《文訊》