看韓國劇，時常會看著食泡麵的鏡頭。in（他們）閣敢若真大食，兩三个人也煮一大鼎。有時連碗都毋免，隨人用一雙箸直接uì（從）鍋仔夾起來食；有的人用鍋仔蓋當做盤仔來承（接）。

食泡麵閣有特別的意思，查某囡仔若請你去伊的厝內食泡麵，就表示恁的關係會當進一大步。

看真濟這款鏡頭，我有一點仔好奇，韓國泡麵敢遐爾（hiah-nī，那麼）好食？

佇（tī，在）台灣，食泡麵的可能一般是學生、上班族抑是勞工；因為方便。像阮家己煮食的家庭，就袂去食。無煮飯的時，煮水餃、煎蔥油餅攏比食泡麵較「照起工」；欲食麵也是家己煠（sa̍h，燙）麵，家己煮料。

著，我的心理，食泡麵是姑不而將、真正不得已的時的食物。

尤其二、三十年前，泡麵的名聲無好，逐家攏講伊有防腐劑，食siunn濟，人會變做木乃伊，過身了後屍體都袂爛。這幾年，做麵技術較進步，食品管理較嚴格，應當無彼款問題。

我食泡麵的機會可能無超過二十擺，毋過，有一年uì莫斯科到聖彼德堡的火車頂食的泡麵，經過二十外年猶會記得。

彼暗，阮佇Bolshoi大劇院看過＜天鵝湖＞表演了後，趕去坐火車。西伯利亞鐵路，予人想著小說和電影內底的故事；愛情的抑是偵探的。可惜，半暝的火車，外口暗暗，kan-na（只）看著停靠站的燈火；講鐵枝（軌）闊，火車卻幌（hàinn）來幌去，有小小兩頂眠床的車廂，若搖籃；忝（thiám，累）甲睏去矣，閣予伊幌精神（醒），掠做是地動。

看表演前就食暗頓，早就枵甲大腸告小腸。這時陣，隔壁房間的朋友提一碗泡麵來予阮食。想袂到遐爾好食！一方面是腹肚枵，一方面是俄羅斯物件食畏矣，寒帶國家，鹹的足鹹，甜的足甜；魚子醬雖然名貴，配焦焦的餅食也siān（厭倦）矣。

彼碗泡麵的滋味，予我數念到今，應該和天時地利有關係。

另工，來去買兩杯韓國泡麵試看覓；看會食著韓劇的滋味無。

《聯合報》副刋2021.02.11