人的心理真奇怪，舊年我愛穿烏色的衫；感覺穿烏衫五官較明，肉較白。配拍鐵仔褲（牛仔褲），配花仔布裙攏好看。

今年看著烏衫就熱，感覺穿白衫，人較清爽，較清氣，面看起來也較白。熱天的衫主要是棉的和麻的，熨熨咧，白衫足濟領；毋過竟然kan-na（只）拍鐵仔褲較好配，布裙的花色無啥適合。

所以，就想講來去買一領拍鐵仔布的裙，粗穿、幼穿攏會使；像人講的「會當做桌布，也會當做禮數」。

結果，看幾若間服裝店和路邊攤仔，kan-na看著一領兩幅裙，狹狹，閣有繡花，我無愛。

欲買的買無成，煞（suah，竟然）去買一領米色的長褲、一領紅豆色的褲裙和一領橫巡（條紋）的衫。

轉到厝，我就後悔矣。仝款的衫褲已經不只一兩領；加買加鎮位，一个熱天有可能袂穿著。

一个朋友講伊參加旅行團，因為「群眾效應」，逐家一路買物件，食的、穿的、看的；每一暗，攏拍拚咧整理行李。這位朋友看在眼內，共家己講，「無買上俗（便宜）」「無買袂死」。轉來台灣，有人就開始後悔，講真濟攏是無必要買的；有的價數也無比佇台灣買較便宜；上害的是買一寡品質無掛保證的藥品、保養品。

我也有一个足無面子的經驗，兩年前去日本，聽導遊講甲喙角全泡（天花亂墜），放阮入去免稅店的時，我竟然佇有限的時間內底，買一堆有的無的；連一款講暗時貼佇跤底，好睏，閣會當共身軀內底的毒素排出來的中藥貼布也買三盒！

後來才理解，時間有限，驚買無，我才會失去理智，烏白買啊。

2020.9.27《聯合報》副刋