我慣勢穿素色的衫，會買彼領花仔衫，一方面看伊的花草素素仔，接近自然色；一方面伊是棉的，熱天穿起來涼涼仔。上重要的是，俗俗仔，無貴，免啥考慮就買會落去。

一遍轉去員林，穿彼領衫，大姊講，「誠久毋捌看著你穿花的。」

「有媠無？」

逐遍真注意我的穿插（穿著）、呵咾我gâu（擅）買衫、gâu配衫的大姊看一時仔，講，「佇厝內穿袂bái（差），看起來涼涼仔。」

自彼陣開始，彼領衫就變做厝內粗穿的，kan-na（只）去菜市仔，伊才有機會出門。

昨昏，禮拜日，囡仔照常轉來食飯，後生竟然講，「媽媽這領衫真媠。」

我穿的就是彼領花仔衫。

新婦紲落（suà--lo̍h，接下來）講，「配牛仔褲一定真好看。」

我淡薄仔意外，從來罕得聽著囡仔呵咾我的穿插，這日予in（他們）注意著的竟然是一領我穿咧煮飯炒菜、加減有噴著油的衫。

「真雅氣，看起來是日本布料。」

我講毋是啦，一領才三百箍。

既然予囡仔按呢「另眼相看」，我講，「看起來，我著來共伊洗洗、熨熨咧。」

好好仔對待伊，佗一工和朋友約會的時，配牛仔褲穿出去。

按呢講起來，我實在是無自信、無主張的人，一領衫的媠抑bái，竟然愛予別人決定。

伊的價數嘛影響著伊的價值，伊若至少一千箍以上，聽大姊講伊適合粗穿的時，我一定會替伊辯護；講伊布料好，花草媠，頷領（ām-niá）有特色。

無法度，衫俗（便宜），就予人「看無夠重」；洗的時，嘛是擲入去洗衫機，隨在伊絞；不過，有橐（lok）入去網仔袋。

貴的衫較耐穿，其實也是因為予人較好禮仔照顧；有時閣提去洗衫店焦（乾）洗。

出世佇經濟較好的家庭的囡兒會較健康較成材，真大部份嘛是因為受著較好的照顧和栽培啊。 

2020.8.5《自由時報》副刋