阿圓收著朋友相送的一箱透早才挖起來的麻竹筍，欲分予逐家食，「產地直接來的，真正幼。緊來提，才袂予伊柯（kua，粗糙，老）去。」

天氣有較熱，我嫌撥工去提麻煩：伊熱情，直直鼓吹，講足大支，會當一部份煮湯，一部份滷抑是炒。

偌大支？伊講有五十公分。

正經？筍仔一般攏三十公分左右，毋捌（不曾）看過遐爾長的。

好哩蹛（tuà，住）附近的阿華第二工欲去提，伊的囝婿開車，會當順紲（sūn-suà，順便）共我的送來。

看著筍仔，我好奇，提尺出來量。三十六公分。準做阿圓有削掉較粗的部份，嘛無可能削掉一公分以上。可見伊的目測能力有問題，也有可能伊根本無寸尺觀念。

想欲留到兩日後囡仔轉來才食，我共伊切做幾塊，先炊起來；筍仔袂囥（khǹg，放）得，無先處理驚會柯去。我共阿圓講，「放心，筍仔猶真幼，敢若宋仲基的皮膚。」

這有典故，兩個外月前，我報伊看韓國連續劇《太陽的後裔》，伊無啥佮意（kah-ì，喜歡），主要的理由竟然是，「連演特戰部隊軍人的宋仲基的皮膚都遐爾幼，無真實感！」

筍仔真正幼麵麵，我切片煮一鼎湯，閣切絲和肉絲、香菇絲炒一盤。食材新鮮，免啥料，本身就真清甜。

逐家佇群組報告家己的成績，有人煮排骨筍片，香菇干貝炒筍絲；有人筍箍滷香菇豬肉。

罕得煮食的阿華也貼兩張相片，講伊煮豆腐筍湯和絞肉炒筍絲。「我切的筍絲親像筍條：毋過，哺（咀嚼）起來較有額（份量）。」

逐家呵咾伊有進步矣，不過，伊紲落寫的予我笑出來。

伊講，「我毋知影筍仔愛削偌濟皮，煮湯的是用頭的部份切的，食起來有一點仔割喙，有的哺過猶有纖維，吞袂落去，愛呸出來。」

真趣味，佇外商公司做過主管的人，削筍仔遮爾外行。

我想著幾若年前我去買綠竹筍的時，賣筍的歐巴桑問一个二三十歲的小姐，「筍仔你欲創啥？」

「欲食。」

歐巴桑講，「我是問你欲煮湯抑是欲煠（sa̍h，燙）起來搵豆油冷冷仔食。」

煮湯，伊著會共箬（ha̍h，竹籜）剝清氣；若欲煠，就kan-na（只）共筍仔尾切掉，筍殼斜斜畫一刀，到時較好剝。

保留筍殼去煠，筍仔的甜份才袂流失。

我這个內行人感覺真心適，笑笑仔講，「欲食。」

我叫是（以為）彼位小姐家己也會感覺好笑，想袂到伊共我睨（gîn，瞪）一下，氣怫怫講，「啊無，敢欲買轉去看！」

2020.7.29《自由時報》副刋