銀葉板根子

 布包果核

小丸仔有一雙藝術手，不時利用無路用的物件來創作。用鐵線共松果拗做一隻鴕鳥；用人擲掉的火炭爐仔種藍星花；政治人物分予人的葵扇，伊共紙面拆掉，貼家己畫的圖、寫的字，予伊有新的面目。連桃仔的子，伊都有辦法用無仝款粗幼的砂紙磨甲像玉仔遐爾（hiah-nī，那麼）金滑，變做祓鍊、耳勾的墜仔！

銀葉板根的子免磨，咖啡色，樸實自然。伊予我一个拍好中國結的，我提來掛佇淺綠色的帆布包，足好看。最近伊閣抾（khioh，撿）一堆這款偏名「菜包」的子予逐家；伊問我著替我釘勾仔無？我講免，我袂曉拍中國結，無做墜仔的本事，看心適就好。

結果看咧看咧，感覺in親像啥物小動物，規氣用廣告顏料共in畫甲十花五色。九隻排一列，若咧齊步行，想著「九條好漢在一班」，足趣味。

我家己嘛愛抾一寡有的無的，樹葉仔、樹子、彩色鳥仔的羽毛等。第倫桃果子畫做外星人，真笑詼，可惜慢慢會爛去；槭葉翅仔木的葉仔硩（teh，壓）平，倒面（反面）的色水和葉脈攏真媠，會當寫字；大葉欖仁的葉仔，紅甲若寶石，毋過兩三日就變做咖啡色，kan-na（只）會當靠相片共我和伊中間美麗的緣份保存起來。

  大葉欖仁子做的龜

阿圓bat（曾經）予我一隻大葉欖仁的子做的龜。伊用番仔火枝拗四肢跤，和紅色的頭殼；趁樹仔子猶青青軟軟的時，共in鬥予好。等子變咖啡色、𠕇硞硞（tīng-khok-khok，硬幫幫），尾翹翹，就親像一隻行路有風的龜矣。

自彼陣，我認真注意阮社區彼欉有兩層樓仔懸（kuân，高）的大葉欖仁；可惜兩年來攏無看著子。一位做伙運動的太太講這欉樹仔老甲無法度生囝啦，另外一位講伊是公的，袂結子。這款講法植物專家毋知會同意無？

一年前的熱天，去淡水看篆刻展覽佮耍「拓印」，轉來的時行淡水河邊，竟然看著一欉結真濟子的欖仁樹，一把有十外粒。樹仔無大欉，伸手就挽會著。我挽一大把，轉來用番仔火枝共in鬥頭鬥跤。青青，敢若綠蠵龜，足古錐，看袂siān（厭倦）。

經過幾日，in慢慢仔轉咖啡色。無疑悟（沒想到），in的水分消失真濟，竟然勼（kiu，縮）甲若橄欖子，若烏棗：和阿圓彼隻自然熟成的龜徛（khiā，站）做伙，根本袂比得。

人講強挽的果子袂甜，原來強挽的果子也袂成龜啊。

2019.3月號《文訊雜誌》