紅龍草



 斑葉紅雀珊瑚
   

我無「綠手指」，上愛種的是插枝就會活的植物，可比紅龍草。

有人佇Line的群組內，討論種花；我就按呢傳一張紅龍草的相片予in（她們）看，講這兩長盆的草是阮兜（tau，家）陽台的閘屏（屏風），閘日頭，閘外口噪耳的聲；日頭照著，in有一種透明的紅，真媠。

有人也想欲種。

我兩節兩節鉸一堆，分做一包一包；交予in的時，我講每一枝攏有兩个「關節」，下面彼个節種落塗予伊發根，面頂彼个予伊發穎（芽）。

「伊會開花無？」有人問。

我講伊會開細細圓圓的白花；不過，媠的是紅色的葉仔。「嫌枝siunn（過於）長的時，就鉸落來插佇邊仔，予伊傳後代。」

我同時也送in綠色的斑葉紅雀珊瑚。「小綠和小紅」做伙翕的相片誠影目。

有人較無種花的經驗，認真問我愛用啥款塗？按怎照顧？我講免驚，會當插枝的植物，攏真耐命；若siunn掛心，伊會有壓力，甚至會聳勢（高傲）起來，予你歹應付；免下肥料，水也無一定愛逐日沃（澆）；若濕氣重，葉仔有精神，無沃無要緊。

In笑我敢若咧講人。我講著啊，植物親像囡仔，平常心對待，伊會沓沓仔（慢慢）大漢；愛過頭，飼siunn濟，根會爛去。我補充，「你若和伊講話、唱歌上好，伊會感受著你的愛。」科學家早就證明植物有感情。

後遍，逐家若猶有興趣，我才挖一寡尾蝶花（鳶尾花）來相送。這種花是落地生根，葉仔發出來的新葉貼佇塗跤，就直直湠（thuànn，蔓延）；不三時疏開一

寡出去，才袂窒（that，塞）甲袂喘氣。

2019.3月號《文訊雜誌》