朋友講伊罕得呵咾伊的部屬，毋是無量（小氣），是伊也毋bat（曾）肯定過家己。伊講：「因為確實無夠好啊，有啥好肯定的？」

哇，遐爾（hiah-nī，那麼）聰明、遐爾有成就的人竟然無肯定過家己？可能是對家己工作的要求siunn（過於）懸（kuân，高），對同事的要求自然也懸。

我無仝款。我已經退休，無工作要求的問題；毋過，看人文章寫足好，看人圖畫足好；看人gâu（擅）演講、gâu煮食；看人會曉這會曉彼，我攏足欣羨，也真心表達我的佩服。有一遍，一位減我二十歲的朋友好意共我講，「你不時按呢呵咾別人，會對家己失去信心喔。」

講按呢有理，不過，斟酌想起來，我自少年就對家己無信心，毋是看人比我較本等才失去信心啊。可能是愈無自信，才愈感覺別人攏真厲害。

三十年前就有一位大主編共我講仝款的話。伊是長輩，我聽著無特別的感覺；這陣予比我較少年的朋友按呢關心/指點，我就有一點仔無自在矣。過一時仔，我認真解說（辯解？），「我有時嘛真佩服家己啊。」到底是好朋友，伊的目睭光起來。我講，「我佩服家己遮爾gâu欽佩別人。」

 2019.2.27《自由時報》副刋